Pandemiya ilə əlaqədar təxirə salınmış Respublika fənn olimpiadasının respublika mərhələsinin final turu iyun ayının birinci yarısında keçiriləcək.
Belə ki, iyunun 5-də riyaziyyat və fizika fənləri üzrə, iyunun 9-da Azərbaycan dili və ədəbiyyatı, coğrafiya, tarix fənləri üzrə, iyunun 11-də kimya və biologiya fənni üzrə final turu Naxçıvan şəhər 4 nömrəli tam orta məktəbdə keçiriləcəkdir.
Şagirdlərə sualları cavablandırmaq üçün 3 saat vaxt veriləcək.
Bütün fənlər üzrə olimpiada saat 10:00-da başlayacaq.
Fevral ayında keçirilmiş respublika mərhələsinin yarımfinal turunun nəticələrinə əsasən, muxtar respublika üzrə uğur qazanmış 87 şagird final turunda iştirak hüququ qazanıblar. İştirakçıların təhlükəsizliyinin təmin edilməsi, sağlamlığının qorunması məqsədilə bütün qabaqlayıcı tədbirlər nəzərə alınacaq və həyata keçiriləcəkdir.
Ülviyyə HACIYEVA
Naxçıvan Muxtar Respublikası
Təhsil Nazirliyinin mətbuat xidməti