Dünyada yayılmış pandemiya ilə əlaqədar olaraq Azərbaycanda, o cümlədən muxtar respublikada bütün təhsil müəssisələrində tədris, təlim-tərbiyə prosesi dayandırılıb. Muxtar respublika ərazisində koronavirus infeksiyasının yarada biləcəyi təhlükənin qarşısının alınması məqsədilə bütün sahələrdə olduğu kimi təhsil sahəsində də təxirəsalınmaz tədbirlər həyata keçirilir.

Yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi məqsədilə muxtar respublikada mart ayının 4-dən 31-dək ilkin mərhələdə Təhsil Nazirliyinin tabeliyində yerləşən bütün ümumtəhsil məktəblərində dezinfeksiya işləri aparılıb, tibbi-profilaktik və dezinfeksiyaedici tədbirlər həyata keçirilib.

Tədrisin yenidən müvəqqəti dayandırılması ilə əlaqədar verilən digər qərardan sonra da məktəblərdə tibbi-profilaktik, dezinfeksiyaedici və digər qabaqlayıcı tədbirlər davam etdirilib. Belə ki, Təhsil Nazirliyinin tabeliyində fəaliyyət göstərən təhsil müəssələrində aprelin 1-dən həyata keçirilən dezinfeksiya ilə bağlı tədbirlərin ikinci mərhələsində muxtar respublika ərazisində olan bütün təhsil müəssisələrində təkrar tibbi-profilaktik və digər qabaqlayıcı işlər həyata keçirilib.

Muxtar respublikada təhsil müəssisələrinin təmizliyi və şagirdlərin sağlamlığının etibarlı qorunması daim diqqətdə saxlanılıb, məktəblərin dezinfeksiyası ilə əlaqədar profilaktik tədbirlər vaxtaşırı olaraq həyata keçirilib.

Naxçıvan Muxtar Respublikası

Təhsil Nazirliyinin mətbuat xidməti