İki aya yaxındır ki, (COVİD-19) koronavirus pandemiyası təhlükəsi ilə bağlı ölkəmizdə xüsusi karantin rejimi elan olunmuşdur. Bununla əlaqədar olaraq muxtar respublikamızın bütün ümumtəhsil müəssisələrində olduğu kimi rayonumuzun ümumtəhsil məktəblərində də təlim-tədris prosesi müvəqqəti olaraq dayandırılmışdır. Müəllim və şagird kollektivlərinin sağlamlığının qorunması məqsədi ilə təhsil müəssisələrinin yerləşdiyi binalarda dezinfeksiya işləri aparılmışdır.

Şagirdlərin bilik və bacarıqlarla təmin olunması, onlara təlim prosesində keçiriləcək dərs mövzularının  çatdırılması istiqamətində də müəyyən işlər görülmüşdür.

Şagirdlər Naxçıvan Muxtar Respublikası Təhsil Nazirliyinin rəsmi internet saytında yerləşdirilmiş virtual dərs resurslarından faydalanaraq öz bilik və bacarıqlarını təkmilləşdirmək üçün faydalanırlar.

Şagirdlərdə mütaliə və nitq vərdişlərinin formalaşması məqsədilə sinifdənxaric oxu materiallarından istifadə etmələri, onların müəyyən layihələr üzərində işləmələrinə diqqət yetirilmişdir. Karantin rejimi müddətində sinif rəhbərləri valideynlərlə müntəzəm əlaqə saxlamış, şagirdlərin təlim və tərbiyə prosesinin düzgün aparılması məqsədilə onlarla marifləndirici söhbətlər aparmış, şagirdlərin müəllimlərinin verdikləri tapşırıqları yerinə yetirmələri üçün valideynlər tərəfindən şərait yaradılmasına nail olmuşlar.

Fərəhli haldır ki, Culfa rayonunda bütün ümumtəhsil məktəblərində olan müəllim və şagirdlər “Evdə qal” aksiyasına qoşulmaqla bərabər, karantin rejiminin bütün tələblərinə əməl etmiş və heç bir qayda pozuntusuna yol verməmişlər.

Culfa Rayon Təhsil Şöbəsi