Naxçıvan Şəhər Təhsil Şöbəsi tərəfindən 02 iyun 2020-ci il tarixdə Naxçıvan şəhər ümumtəhsil məktəblərinin hərbi rəhbərləri ilə “Şagirdlərin milli ruhda tərbiyəsi və vətənpərvərlik hissinin aşılanması” mövzusunda onlayn müzakirə keçirilib.

Müzakirə zamanı Naxçıvan Şəhər Təhsil Şöbəsinin metodisti Şahmar Hüseynov vurğulayıb ki, vətəni müdafiə etmək məktəbdə təhsil alan hər bir şagirdin vətəndaşlıq borcudur. Biz də şagirdlərimizi vətənimizin fəal müdafiəsinə hazırlamalı və ilkin hərbi vərdişləri öyrətməliyik. Şagirdlərdə vətənə məhəbbət hissini artırmaq, vətənpərvərliyin məzmununu onlara düzgün çatdırmaq əsas vəzifələrimizdəndir. Metodist bildirib ki, şagirdlərlə mütəmadi olaraq, bu istiqamətdə söhbətlər aparılmalı, qəhrəmanlıq nümunələrindən danışılmalı, respublikamızda olan ali hərbi məktəblər haqqında informasiya verilməli, bu haqda şagirdlər ətraflı məlumatlandırılmalıdır.

Onlayn müzakirədə Heydər Əliyev adına Hərbi Liseyə, ali və orta ixtisas hərbi məktəblərinə və xüsusi təyinatlı müəsissələrə qəbulla bağlı hərbi rəhbərləri maraqlandıran suallar cavablandırılıb, görülən işlər müzakirə edilib.  Hərbi rəhbərlərə şagirdlərlə imtahan qabağı məşğələlərin təşkili və psixoloji söhbətlərin aparılması istiqamətində tövsiyələr verilib.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti