Şərur Rayon Təhsil şöbəsinin təşkilatçılığı əsasında rayon ümumtəhsil məktəblərinin direktorları ilə 2019-2020-ci tədris ilində ümumi təhsil pilləsi üzrə təhsilalanların məktəbdaxili qiymətləndirilməsinin aparılması haqqında  onlayn iclas keçirilib.

İclasda çıxış edən Şərur Rayon Təhsil şöbəsinin müdiri Kamil Məmmədov bildirib ki, Naxçıvan Muxtar Respublikası Təhsil Nazirliyinin 01.06.2020-ci il tarixli 57 nömrəli müvafiq əmrinə əsasən ümumtəhsil məktəblərinin I siniflərində təhsil alan şagirdlərə məktəbdaxili qiymətləndirilmələr aparılmayacaq və müvafiq olaraq şagirdlər         sinifdən-sinfə keçiriləcək. II-XI sinif şagirdlərinin tədris ilinin I yarımili üçün yarımillik balları və qiymətləri onların tədris ili üzrə müvafıq olaraq illik balları və qiymətləri kimi qəbul ediləcək.

Onlayn iclasda buraxılış və qəbul imtahanları ilə bağlı məsələlər də müzakirə edilib. Həmçinin yay tətili dövründə məktəb binası, ərazisi və həyətyanı sahəsində gülkarlıqların, bağların qorunub saxlanılması ilə əlaqədar bu gündən məktəblərdə monitorinqə başlanılması vurğulanıb.

Sonda direktorları maraqlandıran suallar cavablandırılıb

Ülviyyə Hacıyeva

Naxçıvan Muxtar Respublikası

Təhsil Nazirliyinin mətbuat xidməti