09 iyun 2020-ci il tarixdə Kəngərli Rayon Təhsil Şöbəsinin təşkilatçılığı ilə “15 İyun-Milli Qurtuluş Günü” münasibətilə “Qurtuluş hərəkatı” mövzusunda onlayn açıq dərs keçirilib.

Açıq dərsdə Təhsil Şöbəsinin əməkdaşları, ümumtəhsil məktəblərinin tarix müəllimləri və IX-XI sinif şagirdləri iştirak ediblər.

Açıq dərsin keçirilməsində məqsəd ümummilli lider Heydər Əliyevin dövlətçilik siyasəti, onun zəngin irsinin tədqiqi və təbliği, şagirdlərin müvafiq biliklərinin zənginləşdirilməsi, ölkəmizin dövlət quruculuğu prosesində ulu öndərin xidmətlərinin gənc nəslə çatdırılmasından ibarətdir.

Açıq dərsdə Qıvraq qəsəbə tam orta məktəbinin tarix müəllimi İlkin Əhmədov “Qurtuluş hərəkatı” mövzusunda çıxış edərək, ulu öndər Heydər Əliyevin mənalı həyatı və genişmiqyaslı siyasi fəaliyyətindən, xalqımız və dövlətimiz qarşısında xidmətlərindən danışıb. 15 iyunun müstəqil Azərbaycan tarixinin ən parlaq səhifəsi kimi yaddaşlara əbədi həkk olunduğunu deyib. Ulu öndərin böyük qayıdışının dövlətçilik tariximizin şanlı səhifəsini təşkil etdiyini vurğulayıb.

Açıq dərsdə Ulu öndərin həyat və yaradıcılığından bəhs edən videoçarx şagirdlər tərəfindən maraqla izlənilib.

Açıq dərsin sonunda tarix müəllimi şagirdləri maraqlandıran suallara cavab verib.

Ülviyyə Hacıyeva

Naxçıvan Muxtar Respublikası

Təhsil Nazirliyinin mətbuat xidməti