Sədərək​ Rayon Təhsil Şöbəsi və Uşaq Gənclər Yaradıcılıq Mərkəzinin birgə​ təşkilatçılığı ilə “15 İyun-Milli Qurtuluş Günü”nə həsr olunmuş onlayn şeir müsabiqəsi keçirilib. Müsabiqədə Təhsil Şöbəsinin əməkdaşları, Uşaq Gənclər Yaradıcılıq Mərkəzinin dərnək rəhbərləri,  məktəb direktorları, ümumtəhsil məktəblərinin şagirdləri və dərnək üzvləri iştirak edib.

Tədbirdə çıxış edən Təhsil Şöbəsinin Metodkabinə müdiri Bulud Bağırlı​ qeyd edib ki, ümummilli lider Heydər Əliyevin​ hakimiyyətə yenidən qayıdışı sayəsində Azərbaycan öz müstəqilliyini qoruya bildi və bu gün Azərbaycan müstəqil dövlət olaraq mətinliklə irəliləyir, inkişaf edir, güclənir, qazandığı uğurlarla regionun söz sahibi olan ölkəsi kimi nüfuzunu yüksəldir. Ümummilli liderin xilas etdiyi, nəfəs verdiyi Azərbaycan onun həmişəyaşar ideyalarından ilham alaraq gələcəyə doğru inamla addımlayır.

Sonra Metodkabinə müdiri şeir müsabiqəni açıq elan edib. Maraqlı keçən müsabiqənin sonunda münsiflər heyətinin yekun qərarına əsasən I yerə Sədərək kənd 1 nömrəli tam orta məktəbin VIII sinif şagirdi İnci Rzazadə, II yerə Sədərək kənd 2 nömrəli tam orta məktəbin III sinif şagirdi Fəridə Həsənova,   III yerə isə Sədərək kənd 1 nömrəli  tam orta məktəbinin III  sinif şagirdi Fatimə Məmmədhəsənova layiq görülüb.

Sonda qaliblər təşkilatçıların diplomları ilə təltif olunublar.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti