Naxçıvan Şəhər Təhsil Şöbəsi tərəfindən “15 İyun-Milli Qurtuluş Günü” münasibətilə onlayn tədbir keçirilib.

Naxçıvan Şəhər Təhsil Şöbəsinin baş məsləhətçisi Gülxanım Orucova tədbiri açaraq “15 İyun-Milli Qurtuluş Günü”  münasibətilə hər kəsi təbrik edərək qeyd edib ki, ulu öndər Heydər Əliyev Azərbaycan xalqının və dövlətinin xilaskarı olmasını ölkəmizin müstəqilliyini qoruyub saxlamaqla və yeni inkişaf üfüqləri açmaqla sübuta yetirib. Ümummilli lider müasir müstəqil Azərbaycan dövlətinin memarı və qurucusudur.

Tədbirdə Naxçıvan şəhər ümumtəhsil məktəblərində təhsil alan müxtəlif sahələrdə istedadları ilə fərqlənən 50 nəfərdən artıq şagird iştirak edib və şagirdlər şeir, musiqi, rəqs nömrələri səsləndiriblər. Eyni zamanda, “Üç alov” beynəlxalq yaradıcılıq müsabiqəsində iştirak etmiş şagirdlər də öz hazırladıqları kompazisiya ilə çıxış ediblər. Şagirdlər tərəfindən hazırlanmış videoçarxlar nümayiş olunub.

Sonda Naxçıvan Şəhər Təhsil Şöbəsinin metodisti Könül Mahmudova bütün məktəb kollektivlərinə tədbirdəki fəal iştiraklarına görə təşəkkürünü bildirib və bayram münasibəti ilə məktəbliləri təbrik edib.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti