Kimya, fizika və biologiya laboratoriyaları dərs məşğələlərinin praktik təcrübə əsasında daha səmərəli keçməsi, şagirdlərin nəzəri və təcrübi biliklərinin təkmilləşdirilməsi, onların təlimdə motivasiyasının yüksəldilməsi üçün xüsusi şərait yaradır. Laboratoriyalara nəzarətin daimiliyini təmin etmək məqsədilə Naxçıvan Şəhər Təhsil Şöbəsinin təşkilatçılığı ilə ümumtəhsil məktəblərinin fizika, kimya və biologiya laborantları ilə onlayn iclas keçirilib.

İclasda təhlükəsizlik tələblərinə uyğun olaraq, laboratoriyalarda avadanlıqların və vəsaitlərin qorunmasının  yay aylarında da təmin olunması barədə söhbətlər aparılıb. Laboratoriyalarda avadanlıqların və reaktivlərin yerləşdirilməsi, əyani vəsaitlərin saxlanma qaydaları haqqında əlavə məlumatlar verilib.

İclasda Naxçıvan Şəhər Təhsil Şöbəsinin metodisti Natella Rzayeva laboratoriyalarda təhlükəsizlik məqsədilə yeni tədris ilinə qədər istifadə müddəti bitmiş kimyəvi maddələr və reaktivlər olduğu halda  kənarlaşdırılması qaydaları və formaları ilə bağlı laborantlara tövsiyələr verib. Kimyəvi maddələrin və reaktivlərin adlarının Azərbaycan dilində qeyd olunduğu hissədə mövcud sıradan çıxma hallarının aradan qaldırılması  və sənədləşmə aparılması qaydaları ilə bağlı müzakirələr də aparılmışdır.

2019-2020-ci tədris ilində işə götürülmüş 12№-li tam orta məktəbin biologiya və fizika laborantlarına əlavə metodiki köməklik göstərilib.

Sonda laborantları maraqlandıran suallar cavablandırılıb.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti