Naxçıvan Muxtar Respublikası Şahmat Federasiyasının Kəngərli rayon bölməsi, Kəngərli Rayon Təhsil Şöbəsi və Uşaq-Gənclər Şahmat Məktəbinin birgə təşkilatçılığı ilə Kəngərli Rayon Şahmat Məktəbində “20 İyul - Beynəlxalq Şahmat Günü”nə həsr olunmuş şahmat üzrə rayon birinciliyi keçirilib.
Yarışın keçirilməsində əsas məqsəd məktəblilər arasında bacarıqlı və istedadlı şahmatçıları üzə çıxarmaq, şahmat oyununu daha da kütləviləşdirmək, şahmatçılar arasında idman və dostluq əlaqələrini inkişaf etdirməkdən idi.
Yarışda çıxış edən məktəbin direktoru Əli Hüseynzadə bütün şahmatçıları Beynəlxalq Şahmat Günü münasibətilə təbrik edərək muxtar respublikada şahmatın inkişafına göstərilən dövlət qayğısı və bunun nəticəsində məktəblilərin bu idman növünə marağının artmasından bəhs edib.
Yarış “İsveçrə” sistemi ilə 12 yaşadək oğlan və qız şahmatçılar arasında şəxsi birincilik formasında keçirilib. Yarışın sonunda oğlanlar arasında Əbdüləzim Abdullayev I, Şəhriyar Tarverdiyev II, Uğur Əsgərov III yerin qalibi, qızlar arasında isə Mələk Babayev I, İnci Babayeva II, Pəri Məmmədova isə III yerin qalibi olub.
Sonda qaliblərə təşkilatçılar tərəfindən diplom və pul mükafatı təqdim olunub.
Ülviyyə HACIYEVA
Naxçıvan Muxtar Respublikası
Təhsil Nazirliyinin mətbuat xidməti