Bu doğma torpağa, bu məmləkətə,

Yurduna, elinə sən yanmalısan.

Əgər istəyirsən azadlığını,

Vətən keşiyində dayanmalısan.

Vətən türküsünün zümzüməsini,

Duymayan vətəni qoruya bilməz.

Vətən dardadırsa çağırış səsinə

Uymayan vətəni qoruya bilməz.

Əgər vətəndaşsan, ana torpağa

Sədaqət andını sən içməlisən,

Vətənə layiqli bir övlad kimi,

Ağır sınaqlardan sən keçməlisən.

Vətən yurd yeridir sənin atanın,

Baban bu torpaqda uyuyur, oğlum.

Torpaqda uyuyan müqəddəslərin,

Ruhları vətəni qoruyur, oğlum.

Adi görünməsin zirvə kəlməsi,

Bu zirvə vətənin hər zərrəsidir.

Bu zirvə vətənin azadlıq səsi,

Şəhidlik ruhunun təntənəsidir.

Başının üstündə üçrəngli bayraq,

Qəlbində Vətənin özünü daşı,

O zaman bu torpaq inamla səni,

Seçəcək, biləcək öz vətəndaşı!

Nazəni Həsənova

Heydər Əliyev adına

Hərbi Liseyin kitabxana müdiri