27 iyul 2020-ci il tarixdə Naxçıvan şəhər Uşaq Gənclər İdman Məktəbinin təşkilatçılığı ilə Gənclər şəhərciyinin mini futbol meydançasında basketbol idman növü üzrə “Topun çiləyərək səbətə salınması texnikası” mövzusunda məşğələ keçirilib. Açıq havada keçirilən məşğələdə 12 şagird iştirak edib. Məşğələnin keçirilməsində əsas məqsəd yeniyetmə və gənclərin bu idman növünə marağını artırmaq, cəldlik və çevikliyi inkişaf etdirmək, yay tətili dövründə şagirdlərin asudə vaxtlarını səmərəli təşkil etmək idi. Məşğələ zamanı basketbol oyununda topun sağ və sol əllə çilənmə texnikası, topu çiləyərkən ayaqlarda hərəkətlərin düzgün gedişatı və topu səbətə salarkən ayaqlarda təkan hərəkətlərinin düzgün yerinə yetirilməsi əyani şəkildə göstərilmiş və lazımi izahatlar verilib. Şagirdlər məşqləri yerinə yetirdikdən sonra buraxılmış səhvlər məşqçi tərəfindən izah olunub.

Eyni zamanda Sədərək​ Rayon Təhsil Şöbəsi və Uşaq Gənclər İdman Məktəbinin birgə təşkilatçılığı ilə  “Yay Məktəbi” adı altında yüngül atletika idman növü üzrə yoldaşlıq görüşü keçirilib. Yarışda Təhsil Şöbəsinin əməkdaşları, idman məktəbinin Yüngül atletika dərnəyinin 16 üzvü və idmançı müəllimləri iştirak edib. Tədbirdə çıxış edən Uşaq Gənclər İdman Məktəbinin direktoru Nizami Bağırov məşqçi müəllim və dərnək üzvülərinə yarışın keçirilməsi haqqında geniş məlumat verərək yarışı açıq elan edib. 100 metr məsəfaədə keçirilən yarışın yekun nəticələrinə əsasən I yerə Aysu Abbasova, II yerə Zeynəb Babayeva, III yerə İsə Nərminə Əliyeva layiq görülüblər. Sonda qaliblər təşkilatçılar tərəfindən diplomla mükafatlandırılıblar.

Həmçinin bu gün Şahbuz Rayon Təhsil Şöbəsi  və Naxçıvan Muxtar Respublikası Şahmat Federasiyası Şahbuz Rayon bölməsinin  təşkilatçılığı ilə şagirdlərin yay tətilinin səmərəli keçirilməsi məqsədi ilə istedadlı şahmatçı şagirdlər arasında şahmat üzrə 7 turdan ibarət olan “Tempo” turniri keçirilib. Yarışda 18 şagird iştirak edib. Yarışın yekun nəticələrinə əsasən Şahin Əliyev          I yerə, Zamin Məhərrəmov II yerə, Nicat İbrahimov isə III yerə layiq görülüb. Sonda qaliblərə pul mükafatı və diplomlar təqdim olunub.

Bundan başqa Şərur rayon Uşaq-Gənclər Yaradıcılıq Mərkəzinin metodist müəlliməsi Cavadova Leylabəyim tərəfindən ümumtəhsil məktəblərinin şagirdləri arasında “Biliyinə güvən” devizi altında fənlərarası onlayn bilik yarışması keçirilib. Yarışda Şərur şəhər 1 nömrəlıi, Şərur şəhər 2 nömrəli, Aralıq kənd və Sərxanlı kənd tam orta məktəblərinin şagirdləri iştirak edib. Yarışın nəticəsinə görə Şərur şəhər 1 nömrəli tam orta məktəbin şagirdi Zərqələm Mehdibəyli I yerə, Şərur şəhər 2 nömrəli tam orta məktəbin şagirdi Məmmədəli Ələsgərov II yerə, Aralıq kənd tam orta məktəbin şagirdi Nuray Məmmədova isə III yerə layiq görülüblər.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti