Bu gün Gənclər Şəhərciyindəki basketbol meydançasında məktəblilərin yay tətilinin səmərəli təşkili məqsədilə oğlanlar arasında basketbol üzrə yoldaşlıq görüşü keçirilib. Görüşdə “Naxçıvan” - “Babək” komandaları qarşılaşıb.

Açılış mərasimində çıxış edən Naxçıvan Şəhər Təhsil Şöbəsinin əməkdaşı Şahmar Hüseynov görüşün keçirilmə məqsədi haqqında komandalara geniş məlumat verib və onlara qalibiyyət sevinci arzulayıb.

Daha sonra Naxçıvan Şəhər Gənclər və İdman İdarəsinin rəisi Xəyal Qurbanov, Naxçıvan Şəhər Uşaq Gənclər İdman Mərkəzinin direktoru Məmmədcəfər Əliyev və Naxçıvan Muxtar Respublikası Basketbol Federasiyasının sədr müavini Turan Həsənov çıxış edərək komandalara uğurlar arzulayıblar.

Beynəlxalq Basketbol Federasiyasının mövcud qaydalarına əsasən keçirilən görüşün yekun nəticəsinə görə “Babək” komandası 44:40 hesabı ilə “Naxçıvan” komandasına qalib gəlib.

Sonda hər iki komanda təşkilatçıların diplom və fəxri fərmanları ilə mükafatlandırılıblar.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti