Bu gün Ordubad Rayon Təhsil Şöbəsi və Uşaq-Gənclər İdman Məktəbinin  birgə təşkilatçılığı ilə ümumtəhsil məktəblərinin qızlardan ibarət basketbol komandaları arasında rayon birinciliyi keçirilib. Birinciliyin keçirilməsində əsas məqsəd şagirdlərin yay tətili ərzində asudə vaxtlarını səmərəli təşkil etmək və məktəblilər arasında basketbol idman növünü inkişaf etdirməkdən ibarət olub.

Gərgin və maraqlı keçən birinciliyin final mərhələsində Ordubad şəhər 3 nömrəli tam orta məktəbin komandası ilə Gənzə kənd tam orta məktəbin komandası görüşüb. Oyunun yekun nəticəsinə görə Ordubad şəhər 3 saylı tam orta məktəbin komandası qalib olaraq diplomla mükafatlandırılıb.

Eyni zamanda Ordubad Rayon Uşaq-Gənclər Yaradıcılıq Mərkəzinin “Dərzilik” dərnəyinin rəhbəri Vəsilə İsmayılova tərəfindən “Parça üzərində müxtəlif naxışların işlənməsi” mövzusunda onlayn dərs keçirilib. Mərkəzin dərnək üzvlərinin iştirakı ilə keçirilən dərsdə müxtəlif parçalar üzərində sap və muncuqlarla naxışların işlənməsi qaydaları şagirdlərə göstərilərək izah olunub.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti