Bu gün Sədərək Rayon Təhsil Şöbəsi, Naxçıvan Muxtar Respublikası Voleybol Federasiyasının rayon bölməsi və Uşaq Gənclər İdman Məktəbinin birgə təşkilatçılığı ilə Voleybol idman növü üzrə Sədərək kənd 1 nömrəli tam orta məktəbin və Qaraağac kənd tam orta məktəbin voleybol komandaları arasında rayon birinciliyi keçirilib. Qaraağac kənd tam orta məktəbin voleybol meydançasında keçirilən birincilikdə rayon Təhsil Şöbəsinin, Naxçıvan Muxtar Respublikası Voleybol Federasiyasının rayon bölməsinin, Uşaq Gənclər İdman Məktəbinin əməkdaşları və ümumtəhsil məktəblərinin şagirdləri iştirak edib.
Gərgin və maraqlı keçən mübarizənin sonunda Sədərək kənd 1 nömrəli tam orta məktəbin “Əjdəkan” komandası qalib olub. Qalib komanda təşkilatçıların diplom və voleybol topları ilə mükafatlandırılıb.
Eyni zamanda, 17-19 avqust 2020-ci il tarixlərində Sədərək rayon Təhsil Şöbəsinin və Uşaq-Gənclər Yaradıcılıq Mərkəzinin birgə təşkilatçılığı ilə Sədərək Rayon Uşaq-Gənclər Yaradıcılıq Mərkəzində “Çay daşları üzərində təsvir” adı altında şagirdlər arasında rəsm müsabiqəsi keçirilib.
Keçirilən müsabiqədə qalib olmuş şagirdlərin əl işləri Naxçıvan Muxtar Respublikası Heydər Əliyev Uşaq-Gənclər Yaradıcılıq Mərkəzində elan olunmuş “Çay daşları üzərində təsvir” adlı müsabiqəyə göndərilib.
Həmçinin, dünən Sədərək rayon ümumtəhsil məktəblərinin qız şagirdləri arasında atletika üzrə 5 km məsafəyə qaçış üzrə rayon birinciliyi keçirilib. Keçirilən birincilikdə Təhsil Şöbəsi, Atletika Federasiyasının rayon bölməsi, Gənclər və İdman İdarəsinin əməkdaşları və Uşaq Gənclər İdman Məktəbinin məşqçi müəllimləri, ümumtəhsil məktəblərinin şagirdləri iştirak edib. Maraqlı keçən yarışın sonunda I yerə Sədərək kənd 1 nömrəli tam orta məktəbin VI sinif şagirdi Aysu Abbasova, II yerə Sədərək kənd 1 nömrəli tam orta məktəbin VI sinif şagirdi Zeynəb Babayeva və III yerə isə Sədərək kənd 1 nömrəli tam orta məktəbin VI sinif şagirdi Gülnarə Şirəliyeva layiq görülüblər.
Qaliblər sonda təşkilatçıların diplom və hədiyələri ilə mükafatlandırılıblar.
Ülviyyə HACIYEVA
Naxçıvan Muxtar Respublikası
Təhsil Nazirliyinin mətbuat xidməti
