Muxtar respublikada şahmatın kütləviliyinin artırılmasına və bu sahənin inkişafına yüksək qayğı göstərilir. Şahmatın maddi-texniki bazası möhkəmləndirilmiş, Naxçıvan şəhərində Şahmat Mərkəzi, rayon mərkəzlərində yeni şahmat məktəbləri tikilib istifadəyə verilmişdir. Muxtar respublika ümumtəhsil məktəblərində yaradılan şəraitdən səmərəli istifadə, təhsil müəssisələrinin bacarıqlı və bilikli müəllimlərlə təmin olunması daim diqqətdə saxlanılmış, ötən müddət ərzində şahmat fənnini tədris edən müəllimlərin nəzəri və təcrübi biliklərinin yoxlanılması məqsədilə Naxçıvan Muxtar Respublikası Təhsil Nazirliyi və Naxçıvan Muxtar Respublikası Şahmat Federasiyasının birgə təşkilatçılığı ilə keçirilən sertifikasiyalarda uğurlu nəticə göstərən 487 müəllimin ümumtəhsil məktəblərində şahmat fənnini tədris etməsinə icazə hüququ verən sertifikat verilmişdir.

Bu gün muxtar respublikada fəaliyyət göstərən təhsil müəssisələrində şahmatı tədris edən müəllimlər arasında müxtəlif kateqoriyalar üzrə şəhər və rayon birincilikləri ilə yanaşı, muxtar respublika ərazisində mütəmadi olaraq tempo yarışları, müxtəlif beynəlxalq yarışlar keçirilir. Növbəti təşkil edilən yarış avqustun 24-də Naxçıvan Muxtar Respublikası Şahmat Federasiyasında muxtar respublika ümumtəhsil məktəblərində şahmat dərsini tədris edən gənc müəllimlər arasında muxtar respublika birinciliyi olub. Birinciliyin keçirilməsində məqsəd müəllimlər arasında intellektual idman növü olan şahmat oyununu təbliğ etmək, güclü şahmatçıları aşkara çıxarmaq, eyni zamanda müəllimlərin asudə vaxtlarını mənalı və səmərəli təşkil etmək idi. Naxçıvan Muxtar Respublikası Şahmat Federasiyası, Naxçıvan Muxtar Respublikası Təhsil və Gənclər və İdman nazirlikləri və Naxçıvan Muxtar Respublikası Gənclər Fondunun birgə təşkilatçılığı ilə keçirilən birincilikdə muxtar respublikadan 50 gənc müəllim iştirak edib.

Gərgin və maraqlı keçən birinciliyin yekun nəticələrinə görə kişi şahmatçılar arasında rayonundan Hüseynzadə Əli Vəkil oğlu (Kəngərli rayonu) I yerə,  Zeynalov Tural Sücayət oğlu (Naxçıvan şəhəri) II yerə, Hüseynov Samil Fərman oğlu (Sədərək rayonu) III yerə, qadın şahmatçılar arasında isə Məmmədova Lamiyə Məhəmməd qızı (Ordubad rayonu) I yerə, Şükürova Fəridə Habil qızı (Naxçıvan şəhəri) II yerə, İsmayılova Nərmin Ramiz qızı (Culfa rayonu) isə III yerə layiq görülüb.

Qaliblər təşkilaçılar tərəfindən diplom və hədiyyələrlə təltif ediliblər.

Ülviyyə HACIYEVA

Naxçıvan Muxtar Respublikası

Təhsil Nazirliyinin mətbuat xidməti