Naxçıvan Dövlət Tarix Muzeyində 27 oktyabr 2020-ci il tarixdə Naxçıvan Muxtar Respublikası Təhsil və Mədəniyyət nazirliklərinin birgə təşkilatçılığı ilə “Azərbaycanın dövlət müstəqilliyi əbədidir, sarsılmazdır, dönməzdir” mövzusunda açıq dərs keçirilmişdir. Açıq dərs Naxçıvan şəhər 1, 2, 3 və 4 nömrəli tam orta məktəblərinin 20 şagirdinin iştirakı ilə Naxçıvan şəhər 1 nömrəli tam orta məktəbin tarix müəllimi Zəminə İbrahimova  tərəfindən aparılmışdır.

Bildirilmişdir ki, azadlıq, müstəqillik ayrıca bir vətəndaş üçün eyni zamanda  bütöv xalqlar, millətlər üçün ən müqəddəs, ən şirin nemətdir. Biz azadlığımızın, müstəqilliyimizin yolunu illərlə gözləmişik, mübarizə aparmışıq, bu yolda minlərlə şəhid vermişik. Azadlığı, müstəqilliyi əldə etmək nə qədər çətindirsə onu qoruyub saxlamaq bir o qədər mürəkkəb və ağır məsələdir. Qüdrətli və möhkəm dövlət olmadan azadlıq və müstəqillik də yoxdur. Azərbaycanın dövlət müstəqilliyi əbədidir, sarsılmazdır, dönməzdir və müstəqil dövlətimizin qədrini bilmək, onu qorumaq, inkişafına əlimizdən gələn köməyi göstərmək hər birimizin müqəddəs borcudur.

Qeyd edilib ki, Azərbaycan 1918-1920-ci illərdə müsəlman Şərqində ilk parlamentli, demokratik respublika qurmuş, lakin xalqımızın böyük çətinlikə, savaşlar sayəsində əldə etdiyi bu müstəqillik uzun müddət sürməmişdir. Bu tarixi hadisə qısa olmasına baxmayaraq, əhəmiyyəti baxımından xalqımızın tarixi yaddaşına əbədi olaraq həkk olunmuşdur.

Sonra şagirdlərə muzeydə olan eksponatlar haqqında geniş məlumat verilmişdir.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi