Naxçıvan Muxtar Respublikası Nazirlər Kabinetinin 2020-ci il 19 iyun tarixli 110 nömrəli qərarı ilə təsdiq edilmiş “Naxçıvan Muxtar Respublikasının dövlət ümumi təhsil müəssisələrində işləyən təhsilverənlərin sertifikatlaşdırma Qaydası”na uyğun olaraq Ordubad Rayon Təhsil Şöbəsinin tabeliyində olan ümumtəhsil müəssisələrində işləyən, əsasən attestasiya imtahanının beş ili tamam olan təhsilverənlər üçün Rayon Təhsil Şöbəsi təşkilatçılığı və Bist kənd tam orta məktəbinin direktoru, kurikulum üzrə təlimçi Sahil Əlizadənin dəstəyi ilə kurikulum və pedaqogika üzrə onlayn kurslar təşkil olunub. 22 iyul 2020-ci il tarixdən start götürən kurslar 22 dekabr 2020-ci il tarixdə yekunlaşıb.

Sonda müəllimlərə 20 test tapşırığından ibarət imtahan keçirilib.  İmtahandan ən yüksək nəticə toplayan müəllimlərə Ordubad Rayon Təhsil Şöbəsinin sertifikatları təqdim olunub.

Onlayn qaydada keçirilən yekun kursda Təhsil Şöbəsinin müdiri Samir Zeynalov çıxış edərək müəllimlərə gələcək imtahanda uğurlar arzulayıb.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi