14 yanvar 2021-ci il tarixdə Naxçıvan şəhər 4 nömrəli tam orta məktəbin şagirdləri Cəmşid Naxçıvanski Muzeyində “Təki Vətən yaşasın-Milli Qəhrəmanlığa yüksələn yol” mövzusunda keçirilən açıq dərsdə iştirak etmişlər.

Muzeyin bələdçisi Gülnaz Hüseynova 44 günlük müharibədə qazandığımız böyük qələbə münasibətilə şagirdləri təbrik edərək bildirmişdir ki, bu elə bir qələbədir ki, illər, əsrlər keçsə də hər zaman bizə böyük qürur, fəxarət hissi yaşadacaqdır. Zaman-zaman qəhrəman sərkərdələrimiz, xalqımızın cəsur igid oğulları bu sevinc, qürur hissini bizə yaşadıblar. Minilliklərdən üzübəri uğrunda canlarından, qanlarından keçən igidlərimizin, ərənlərin bizə qoyub getdiyi əmanətidir Vətənimiz. Koroğluların, Babəklərin, Cavanşirlərin, Qaçaq Nəbilərin yadigarıdır Vətənimiz. Bu qəhrəmanlar torpaqlarımız uğrunda canlarından qanlarından keçdilər. Bizdə bu ərmağanı göz bəbəyimiz kimi qoruyub saxlamalı, gələcək nəsillərə çatdırmalıyıq.

Sonra muzeyin bələdçisi Qarabağ müharibəsində torpaqlarımızın azadlığı uğrunda canlarını fəda edən şəhidlərimiz, Vətənə məhəbbətini, sədaqətini sübut edən gizir Mübariz İbrahimov, general-mayor Polad Həşimov, polkovnik İlqar Mirzəyev kimi Azərbaycanın Milli Qəhrəmanlarının keçdiyi mübarizə yolu haqqında danışmışdır.

Sonda muzeyin ekspozisiyasına baxış keçirilmişdir.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçi