Şahbuz Rayon Uşaq Gənclər Şahmat Məktəbində “2 fevral - Gənclər Günü” münasibətilə Şahbuz Rayon Təhsil Şöbəsi, Gənclər və İdman İdarəsi və Şahmat Federasiyasının Şahbuz Rayon Bölməsinin birgə təşkilatçılığı ilə rayon ümumtəhsil məktəblərinin 8, 10, 12, 14 və 16 yaşlı oğlan və qız şagirdləri arasında şahmat üzrə rayon birinciliyi keçirilib.

Yarış rayonda şahmat idman növünün inkişaf etdirilməsi, istedadlı şahmatçıların üzə çıxarılması, şagirdlər arasında dostluq əlaqələrinin möhkəmləndirilməsi məqsədilə təçkil olunmuşdur.

Tədbiri giriş sözü ilə açan Təhsil Şöbəsinin aparıcı məsləhətçisi Hüseyn Qəhrəmanov öz çıxışında muxtar respublikada şahmat oyununa ayrılan diqqət və qayğıdan, gənc nəslin zehni inkişafında şahmatın əhəmiyyətindən bəhs edib.

Rayon Şahmat Məktəbinin direktoru Əli Gülmalıyev şagirdləri yarışın qaydaları ilə tanış etdikdən sonra yarışa start verilib.

Yarış İsveçrə sistemi üzrə 5 turdan ibarət keçirilib. Yekun nəticələrə əsasən 8 yaşlılar arasında Mövlud Süleymanlı və Ayla Həmzəyeva,10 yaşlılar arasında Fuad Rzalı və Zəhra Ağaməmmədova, 12 yaşlılar arasında Sahil Qurbanlı və İnci Əsgərzadə, 14 yaşlılar arasında Nicat Abduyev və  Fidan Nəcəfli, 16 yaşlılar arasında isə Fərid Kərimli və Fəxriyyə Abbasova I yerə layiq görülüblər.

Qalib şahmatçılara yarış təşkilatçılarının diplom və hədiyələri təqdim olunub.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi