Muxtar respublikada ilk dəfə Naxçıvan Muxtar Respublikası Təhsil Nazirliyi tərəfindən şagirdlərdə yaddaş, qavrama, xəyal gücünü, məntiqi düşünmə bacarığını, riyazi hesablamaların zehində sürətli aparılmasını və zehni aritmetika əməliyyatlarını doğru şəkildə icra etmələrini inkişaf etdirmək məqsədilə məktəblilər arasında “Mental Aritmetika” müsabiqəsi keçirilib. Müsabiqə Heydər Əliyev Uşaq-Gənclər Yaradıcılıq Mərkəzində təşkil edilib. Müsabiqə 2 mərhələdə və ümumilikdə 200 şagirdin iştirakı ilə keçirilir.

Müsabiqənin I mərhələsinin fevralın 1-də keçirilən birinci turunda 6-9 yaş kateqoriyası üzrə 80 şagird iştirak edib.

İştirakçılara müsabiqədə 20-si Anzan proqramında, 10-u isə abaküsdə olmaqla ümumilikdə 30 sual təqdim olunub. Suallar elektron lövhədə səsli musiqi, melodiya və abaküs hesablama aləti ilə təqdim olunub. Yarışma müddətində hər bir şagirdin qarşısında abaküs, köməkçi vasitə olaraq kiçik lövhə və qələm olub. Müsabiqənin şərtlərinə görə elektron lövhədə tək və cüt rəqəmli zehni toplama və çıxma əməllərini ən azı 3, ən çoxu 10 say ilə yerinə yetirərək düzgün cavablandıran, abaküsdə iki əl ilə say və vahidlərdən istifadə edərək, riyazi əməliyyatlar apararaq cavablandıran 10 şagird ən yüksək xal toplayaraq II mərhələdə iştirak hüququ qazanıb.

Qeyd edək ki, fevralın 3-də keçiriləcək ikinci turda isə 10-14 yaş kateqoriyası üzrə 120 şagird iştirak edəcək və ən yüksək xal toplayan 10 şagird muxtar respublika mərhələsində yarışmaq hüququ qazanacaq.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi