Şərur Rayon Texniki Peşə və Sürücülük Məktəbində rayon arıçıları ilə “Arılara erkən yaz baxımı” mövzüsunda tədbir keçirilib. Tədbirin keçirilməsində əsas məqsədi Texniki Peşə və Sürücülük Məktəbində təhsil alan müdavimlərlə daha təcrübəli arıçıların görüşünü təşkil etmək, onların bilik və təcrübələrindən yararlanmaq olub.

Tədbiri giriş sözü ilə açan Şərur Rayon Texniki Peşə və Sürücülük Məktəbinin direktoru Vəfadar Ələkbərov “Arıçılığın inkişafında dövlət dəstəyinin rolu” mövzusunda danışmışdır. Naxçıvan Muxtar Respublikası Arıçılar Birliyinin sədr müavini, Şərur Rayon Texniki Peşə və Sürücülük Məktəbinin müəllimi Fikrət Məmmədov isə muxtar respublikada yerli və ənənəvi arı cinslərinin yetişdirilməsi, arı ailələrindən yüksək məhsul götürülməsi üçün köçürülmə ərazilərində zoobaytar qaydalarına əməl edilməsi, xəstəliklərə qarşı vaxtında mübarizə aparılması və məhsul istehsalının artırılması ilə əlaqədar tədbirlərin həyata keçirilməsi məqsədilə Naxçıvan Muxtar Respublikası Ali Məclisi Sədrinin 18 noyabr 2016-cı il tarixli Sərəncamı ilə təsdiq edilmiş “2017-2022-ci illərdə Naxçıvan Muxtar Respublikasında arıçılığın inkişafı üzrə Dövlət Proqramı”nın icrası istiqamətində Şərur rayonunda görülən işlərdən və bu sahəyə göstərilən dövlət qayğısından danışmışdır.

Tədbirdə arıçı kursunda təhsil alan 15 müdavim və Şərur rayon təcrübəli arıçılarından 20 nəfər iştirak etmişdir.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi