Fevralın 2-də Culfa Rayon Uşaq-Gənclər Şahmat məktəbində rayon ümumtəhsil məktəblərinin gənc müəllimləri arasında şahmat yarışı keçirilmişdir. Yarış Naxçıvan Muxtar Respublikası Şahmat Federasiyasının Culfa Rayon Bölməsi və Culfa Rayon Təhsil Şöbəsinin təşkilatçılığı ilə təşkil olunmuşdur.

Ümumilikdə 22 gənc müəllimin iştirak etdiyi yarışı Culfa Rayon Təhsil Şöbəsinin müdiri Mehdixan Əliyev giriş sözü ilə açaraq gəncləri “2 fevral - Gənclər Günü” münasibətilə təbrik etmişdir. Bildirilmişdir ki, ulu öndər Heydər Əliyevin hakimiyyətə ikinci dəfə qayıdışından sonra Azərbaycanda dövlət gənclər siyasətinin əsası qoyuldu. 2 fevral 1996-cı il tarixdə ümummilli lider Heydər Əliyevin dəstəyi ilə gənclərin I forumu keçirildi. 1997-ci ildən isə Prezidentin sərəncamı ilə 2 fevral Azərbaycanda Gənclər Günü kimi qeyd olunmağa başladı. Əsası Ulu Öndər tərəfindən qoyulan dövlət gənclər siyasətinin nəticəsidir ki, bu gün ölkəmizdə idarəetmə bacarığı ilə seçilən savadlı və dünyagörüşlü yeni nəsil  yetişmişdir. Bugünkü Azərbaycan gəncliyi ümummilli lider Heydər Əliyevin xalqımız qarşısındakı xidmətlərini yüksək qiymətləndirir, onun bizə bəxş etdiyi Azərbaycanın müstəqilliyini, elmin, təhsilin inkişafını, ölkəmizin siyasi, iqtisadi yüksəlişini, gənclərə olan diqqət və qayğını dərin ehtiram hissi ilə xatırlayır.

Yarışda Culfa şəhər 3 nömrəli tam orta məktəbin müəllimi Nərmin İsmayılova I, Yaycı kənd 1 nömrəli tam orta məktəbin müəllimi Alim İsmayılov II, Culfa şəhər 3 nömrəli tam orta məktəbin müəllimi Aynurə Cəlilova isə III yerə layiq görülmüşdür.

Sonda, qaliblər təşkilatçılar tərəfindən diplom və kubokla təltif olunmuşlar.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi