Sədərək və Kəngərli Rayon Təhsil Şöbələrinin və Uşaq Gənclər İdman məktəblərinin birgə təşkilatçılığı ilə Sədərək kənd 1 nömrəli tam orta məktəbin idman zalında voleybol idman növü üzrə yeni yaradılmış idman klublarının qızlardan ibarət komandaları arasında yoldaşlıq görüşü keçirilib.

Yeni yaradılmış idman klublarının fəaliyyətini genişləndirmək, şagirdlər arasında idmanın bu növünə olan marağı artırmaq və şagirdlərin asudə vaxtlarını səmərəli təşkil etmək məqsədilə keçirilən görüşdə Sədərək və Kəngərli Rayon Təhsil Şöbəsinin əməkdaşları, Uşaq Gənclər İdman məktəblərinin rəhbərləri və voleybol idman klublarının rəhbər və idmançı şagirdləri iştirak edib.

Görüşdə hər komandada 6 olmaqla, ümumuilikdə 12 qız voleybolçu şagird iştirak edib. Maraqlı və bir o qədər də gərgin keçən görüşdən Sədərək Rayon Uşaq Gənclər İdman Məktəbinin voleybol idman klubu qalib olaraq ayrılıb.

Sonda qaliblər təşkilatçılar tərəfindən diplom və kubokla mükafatlandırılıblar. Sədərək Rayon Təhsil Şöbəsi tərəfindən bu kimi tədbirlərin davam etirilməsi diqqətdə saxlanılır.