Kəngərli və Sədərək Rayon Təhsil Şöbələrinin, Gənclər və İdman İdarəsinin, Naxçıvan Muxtar Respublikası Voleybol Federasiyasının Kəngərli rayon bölməsinin birgə təşkilatçılığı ilə Çalxanqala kənd tam orta məktəbinin idman zalında Kəngərli və Sədərək rayonunun oğlan və qızlardan ibarət voleybol idman klubları arasında voleybol üzrə yoldaşlıq görüşü keçirilib.

Yoldaşlıq görüşünün keçirilməsində məqsəd məktəblilər arasında idmanın kütləviliyinə nail olmaq, idman və dostluq əlaqələrini möhkəmləndirmək, voleybol idman növünə marağı artırmaq və şagirdlər arasında sağlam həyat tərzini təbliğ etməkdən ibarət olub.

Görüşdən öncə çıxış edən Təhsil Şöbəsinin əməkdaşı Həsən Tağıyev bildirib ki, Naxçıvan Muxtar Respublikası Ali Məclisi Sədrinin 14 fevral  2020-ci il tarixli Sərəncam ilə təsdiq edilmiş “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”ndan irəli gələn vəzifələr rayonun təhsil müəssisələrində yüksək səviyyədə icra olunur. Dövlət Proqramına uyğun olaraq Kəngərli Rayon Təhsil Şöbəsinin tabeliyində fəaliyyət göstərən təhsil müəssisələrində kadr potensialı və mövcud şərait nəzərə alınmaqla idman klubları yaradılmış və idman klublarının təqdimatı keçirilmişdir. Yaradılan idman klubları uşaq və gənclərin idmana cəlbinin kütləviləşməsində, onların fiziki sağlamlığının qorunmasında, eləcə də asudə vaxtlarının səmərəli təşkilində mühüm rol oynayır.

Daha sonra yoldaşlıq görüşünə start verilib. Maraqlı mübarizə şəraitində keçən qarşılaşmanı oğlanlardan ibarət idman klubları arasında Sədərək, qızlardan ibarət idman klubları arasında isə Kəngərli voleybolçuları qələbə ilə başa vurublar.

Yoldaşlıq görüşündən sonra idmançıların Qarabağlar Türbə Kompleksinə ekskursiyası təşkil olunub.