Kəngərli Rayon Təhsil Şöbəsinin təşkilatçılığı ilə rayon məktəblərində Xocalı faciəsinin 29-cu ildönümünə həsr olunmuş tədbirlər keçirilmişdir. Bu gün Yurdçu kənd tam orta məktəbində “Xocalı - bir millətin kədəri” adlı sənədli film nümayiş olunub.

Filmin nümayiş olunmasında əsas məqsəd şagirdlərə  qəhrəman oğullardan nümunə götürüb əsl vətənpərvər vətəndaş kimi  yetişməyi, yeganə düşmənimizin ermənilər olduğunu unutmamağı, erməni vəhşiliyini dünyaya çatdırmaq üçün üzərinə düşən vəzifələri yerinə yetirməyi və  onlarda vətənpərvərlik hisslərini aşılamağı təbliğ etməkdən ibarətdir.

Tədbirdə qeyd edilib ki, Xocalı soyqırımı bəşəriyyətə, insanlığa qarşı törədilmiş ən böyük cinayətlərdən biridir. Qocaların, uşaqların, qadınların ən qəddar şəkildə qətlə yetirilməsi bəşəriyyətə qarşı çevrilmiş bir vəhşilik, cinayətdir.  Xocalı soyqırımı  Azərbaycan xalqının qan yaddaşına çevrilərək tarixinin bütün mərhələlərində qanlı faciə kimi Azərbaycan xalqı ilə birlikdə yaşayacaqdır.

Eyni zamanda “Xocalı Soyqırımını unutma” devizi altında Kəngərli və Şərur rayon şahmatçıları arasında tempo turniri keçirilib.

Yarış başlamazdan əvvəl qeyd olunub ki, hər il Xocalı soyqırımının ildönümünün qeyd olunması bir daha sübut edir ki, həmin qanlı gecədə erməni təcavüzkarlarının törətdikləri vəhşilik və cinayətin dəhşətləri yaddaşlardan heç zaman silinməyəcək. Bu gün ölkəmizdə Vətənini sevən, hər zaman onun tərəqqisinə çalışan və azadlığı uğrunda canını qurban verməyə hazır olan gənclər ordusu yetişib. Gənc nəsillər bu hadisəni xatırlamaqla bərabər əzmlə çalışmalı, öz savad və dünyagörüşlərini artırmalı, dövlətimizin güclənməsi üçün  dönmədən çalışmalı, şəhidlərimizin vətənpərvərlik və qəhrəmanlıq ənənələrini yaşatmalı, onların ideyalarını gerçəkləşdirməlidirlər.

Yarış Kəngərli və Şərur rayonlarından 57 şahmatçının iştirakı ilə keçirilib. Hər şahmatçıya oyunun sonuna qədər 15 dəqiqə vaxt verilib. Turnirin yekun nəticələrinə əsasən, ümumi yarışda Ayxan Əliyev I, Ercan Sevdimalı II, İlham Abdullayev isə III yerə layiq görülüb. 14 yaşadək oğlanlar arasında Zahid Allahverdiyev, 12 yaşadək oğlanlar arasında Azad Xəlilov, 10 yaşadək oğlanlar arasında Mustafa Bəylərov I yerə layiq görülüb. 14 yaşadək qızlar arasında Məhcəbin Rzalı, 12 yaşadək qızlar arasında Mələk Babayeva, 10 yaşadək qızlar arasında isə İnci Babayeva I yerə layiq görülüb.

Tempo turnirinin qalibləri təşkilatçılar tərəfindən pul mükafatı ilə mükafatlandırılıblar.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi