Sədərək rayon idman klublarında və ümumtəhsil məktəblərində “5 mart - Bədən Tərbiyəsi və İdman Günü”nə həsr olunmuş tədbirlər keçirilib.

Belə ki, Sədərək Rayon Təhsil Şöbəsi, Naxçıvan Muxtar Respublikası Atletika Federasiyasının rayon bölməsi və Gənclər və İdman İdarəsinin birgə təşkilatçılığı ilə rayon ümumutəhsil məktəblərinin şagirdləri arasında atletika idman növü üzrə rayon birinciliyi keçirilib. Sədərək Rayon Mərkəzi Stadionunda keçirilən birincilikdə 3 komanda olmaqla 48 idmançı şagird iştirak edib. Yarış oğlan və qızlar arasında, atletikanın qaçış, nizə atma və yadro itələmə növləri üzrə keçirilib. Yekun nəticələrə əsasən Sədərək kənd 1 nömrəli tam orta məktəbin komandası I yerə, Qaraağac kənd tam orta məktəbin komandası II yerə və Sədərək kənd 2 nömrəli tam orta məktəbin komandası isə III yerə layiq görülüb. Qalib komanda və idmançılar təşkilatçılar tərəfindən kubok və diplomlarla təltif ediliblər.

Eyni zamanda Sədərək kənd 2 nömrəli tam orta məktəbdə Sədərək Rayon Təhsil Şöbəsi, İcra Hakimiyyəti, Gənclər və İdman İdarəsi və Basketbol Federasiyasının rayon bölməsinin birgə təşkilatçılığı ilə “Zərərli vərdişlərə yox deyək, həmişə sağlam olaq” devizi altında basketbol idman növü üzrə klublar arası birincilik keçirilib. Birinciliyin yekun nəticələrinə görə Sədərək kənd 1 nömrəli tam orta məktəbin basketbol klubu görüşdən qalib ayrılıb. Qalib komanda təşkilatçıların diplom və basketbol topu ilə mükafatlandırılıblar.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi