Naxçıvan Muxtar Respublikası Təhsil və Mədəniyyət nazirliklərinin təsdiq etdiyi əsasnaməyə uyğun olaraq Şahbuz rayon ümumtəhsil məktəbləri arasında məktəblilərin dram müsabiqəsinin rayon mərhələsi keçirilib.

Şahbuz Şəhər Mədəniyyət Sarayında təşkil edilən müsabiqədə Yuxarı Qışlaq, Badamlı qəsəbə, Şahbuz şəhər 1  və 2 nömrəli tam orta məktəblərinin şagird kollektivi hazırladıqları səhnələrlə mübarizə aparıblar. Belə ki, Yuxarı Qışlaq kənd tam orta məktəbi üzrə “Kitabi-Dədə Qorqud” eposundan “Bayburanın oğlu Bamsı Beyrək”, Badamlı qəsəbə tam orta məktəbi üzrə Cəlil Məmmədquluzadənin “Anamın kitabı”, Şahbuz şəhər 1 nömrəli tam orta məktəbi üzrə İlyas Əfəndiyevin “Xurşidbanu Natəvan”, Şahbuz şəhər 2 nömrəli tam orta məktəbi üzrə isə Səməd Vurğunun “Fərhad və Şirin” əsərlərindən səhnələr nümayiş olunub.

Münsiflər heyətinin qərarına əsasən Şahbuz şəhər 2 nömrəli tam orta məktəbi I, Şahbuz şəhər 1 nömrəli tamorta məktəbi II, Badamlı qəsəbə tam orta məktəbi III, Yuxarı Qışlaq kənd tam orta məktəbi isə həvəsləndirici yerə layiq görülüb.

Qalib komandalar diplomla mükafatlandırılıblar.

Qeyd edək ki, bu mərhələdə I yerə layiq görülən Şahbuz şəhər 2 nömrəli tam orta məktəbi Səməd Vurğunun “Fərhad və Şirin” əsərindən hazırladığı səhnə ilə 8 aprel 2021-ci il tarixdə keçiriləcək müsabiqənin muxtar respublika mərhələsində iştirak edəcək.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi