Aşıq poeziyasının, ümumən ədəbiyyatımızın ən uca zirvələrindən sayılan böyük ustadımız Aşıq Ələsgərin adı, yaradıcılığı xalqımız üçün əziz və doğmadır. Aşıq Ələsgər XIX əsrin müdrik ozanı, korifey sənətkarı kimi tarixə düşmüş, böyük istedad sahibi kimi xalqımızın əxlaqi sərvətlərini, mənəvi dəyərlərini, adət-ənənələrini, sevincini kədərini çox böyük ustalıqla öz əsərlərində əks etdirmişdir.
Aşıq Ələsgər çoxəsrlik keçmişə malik aşıq sənəti ənənələrini ən yüksək bədii-estetik meyarlarla yeni məzmun qazandırmış, xalq ruhuyla həmahəng əsərləri ilə Azərbaycanın mədəni sərvətlər xəzinəsinə misilsiz töhfələr bəxş etmişdir.
A. Ələsgərin zəngin poetik irsinin geniş tətbiqi, nəşri və təbliğinin mühüm mərhələsi ümummilli lider Heydər Əliyevin adı ilə bağlıdır. Sənətkarın yubileyləri məhz Ulu öndərin təşəbbüsü ilə dövlət səviyyəsində qeyd edilmişdir.
Aşıq Ələsgərin zəngin irsinə yüksək qiymət verən Ümummilli liderin layiqli davamçısı cənab İlham Əliyevin “Aşıq Ələsgərin 200 illik yubileyinin qeyd edilməsi haqqında” Sərəncamı xalqımızın milli dəyərlərinə göstərilən diqqətin daha bir təzahürüdür. Naxçıvan Muxtar Respublikası Ali Məclisi Sədrinin 22 fevral 2021-ci il tarixli sərəncamı ilə təsdiq edilən “Aşıq Ələsgərin 200 illik yubileyinə həsr olunmuş Tədbirlər Planı”na əsasən ədibin yubileyi muxtar respublikada geniş şəkildə qeyd edilir. Bu məqsədlə 10 mart 2021-ci il tarixdə Culfa Rayon İcra Hakimiyyəti, Təhsil və Mədəniyyət şöbələrinin ilə birgə təşkilatçılığı ilə Aşıq Ələsgərin 200 illik yubileyinə həsr olunmuş tədbir Culfa Rayon Mədəniyyət Sarayında keçirilib.
Tədbirdə Culfa şəhər 2 nömrəli tam orta məktəbin müəllimləri Səyyarə Ağayeva və İnarə Nəcəfova “Aşıq Ələsgərin həyat və yaradıcılığı”, “Aşıq Ələsgərin qoşmaları”, Culfa şəhər 3 nömrəli tam orta məktəbin Azərbaycan dili və ədəbiyyatı müəllimi Gülsadə Əliyeva “Aşıq Ələsgərin poeziyası” mövzusunda çıxış ediblər. Tədbirinn bədii hissəsində Culfa şəhər 2 nömrəli tam orta məktəbin şagirdləri Aşıq Ələsgərin şeir və qəzəllərini bədii qiraət etmiş, Mədəniyyət Şöbəsinin Əlincə ansamblının aşıq və saz havaları ilə tədbir yekunlaşmışdır.
