15 mart 2021-ci il tarixdə Naxçıvan Şahmat Mərkəzində “Qapalı  debütlər haqqında məlumat” və “Məsələ həlli” mövzularında növbəti interaktiv dərs keçirilib. Dərsi beynəlxalq dərəcəli hakim Emin Hacıyev aparıb.

Emin Hacıyev elektron şahmat proqramları, “Qapalı debütlər haqqında məlumat” və “Məsələ həlli” haqqında ətraflı məlumat verərək bildirib ki, müasir şahmatın öyrənilməsində elektron şahmat proqramlarından mütləq istifadə etmək lazımdır. “Lichess.org”, “chess.com” kimi internet səhifələrindən istifadə bu gün muxtar respublika məktəblərində geniş tətbiq olunur. Bundan başqa Naxçıvan Şahmat Federasiyasının “Youtube” səhifəsində dərslər yerləşdirilib və eyni zamanda CD formasında məktəblərə çatdırılıb.

Vurğulanıb ki, qapalı debütlər əsasən ağların 1.d4 və 1.c4 gedişləri ilə yaranır. Vəzir qambiti, Yeni hind müdafiəsi, Qədim hind müdafiəsi, Nimçoviç müdafiəsi kimi bir sıra çox oynanılan debütlər qapalı debütlərə aiddir. Bildirilib ki, dərs zamanı baxılan bir neçə qapalı debütdə hər iki tərəf əsasən öz ərazisində plan qurur, gedişlərin mənasını başa düşmək elə də asan olmur. Güclü şahmatçılar daha çox belə debütlərdən istifadə edir. Digər debütlərdə olduğu kimi, bu debütdə də fiqurların aktivləşməsi əsas şərtdir. “Məsələ həlli”ndə isə şagirdlərə 2 gedişli mata aid məsələlər təqdim olunub.

İnteraktiv şahmat məşğələsi saat 11⁰⁰-da ümumtəhsil məktəblərinin şagirdləri üçün, 12⁰⁰-da ümumtəhsil məktəblərində şahmat fənnini tədris edən müəllimlər üçün keçirilib. Bununla yanaşı saat 15⁰⁰-da isə rayon şahmat məktəbləri ilə keçirilən interaktiv dərsdə muxtar respublika şahmatçılarının oyunları təhlil edilib. İnteraktiv dərs­ zamanı şahmatçıları maraqlandıran suallar cavablandırılıb.

Qeyd edək ki, interaktiv dərs muxtar respublikada 200-dən artıq təhsil müəssisəsində şagird və müəllimlər tərəfindən elektron lövhə vasitəsilə izlənilib.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi