Şagirdlərin formalaşmasında, mənəvi aləminin zənginləşməsində, dünyagörüşünün və bilik dairəsinin genişlənməsində, məntiqi təfəkkürünün, idraki bacarıqlarının inkişafında mütaliənin rolu nəzərə alınaraq aprel ayı muxtar respublikanın ümumtəhsil məktəblərində “Mütaliə aylığıˮ elan edilmişdir. Naxçıvan Muxtar Respublikası Təhsil Nazirliyinin “Mütaliə aylığıˮnın keçirilməsi ilə bağlı Tədbirlər Planına uyğun olaraq Şərur şəhər 2 nömrəli tam orta məktəbdə “Nizaminin hikmət və nəsihətləriˮ kitabının müzakirəsi keçirilib. Tədbirdə çıxış edənlər şairin həyatı haqqında qısa məlumat verərək qeyd ediblər ki, Nizami Gəncəvi ədəbi irsinin bu gün də dərindən öyrənilməsinə və məktəblilər arasında təbliğinə ehtiyac var. Şagirdlərə dahi şairin yazdığı poemaların və şeirlərin mütaliə edilməsinin vacibliyi tövsiyə edilmişdir.

Məktəblilər “Nizaminin hikmət və nəsihətləriˮ kitabından parçalar söyləmiş, müəllimlər tərəfindən geniş müzakirələr aparılmışdır.

Belə silsilə tədbirlər rayonun Muğancıq Mehrab, Şərur şəhər 1 nömrəli, Siyaqut, Kosacan, Qarabürc, Püsyan və digər məktəblərində də aparılmışdır.