Kəngərli Rayon Təhsil Şöbəsinin və Heydər Əliyev Uşaq-Gənclər Yaradıcılıq Mərkəzinin birgə təşkilatçılığı ilə Akademik Zərifə Əliyeva adına Şahtaxtı kənd tam orta məktəbində ümumtəhsil məktəblərinin IX-XI sinif şagirdləri arasında “Naxçıvanımızı tanıyaq” müsabiqəsinin rayon mərhələsi keçirilib.

Müsabiqənin keçirilməsində məqsəd müasir Naxçıvanın inkişaf yolları, qədim tarixi, coğrafiyası,  görkəmli nümayəndələrinin yaradıcılıqları haqqında məlumatlılıq səviyyəsini artırmaq, muxtar respublika haqqında əldə etdikləri bilikləri təkmilləşdirmək, zehni inkişafını stimullaşdırmaq, intellektual və yüksək biliyə malik istedadlı şagirdləri aşkara çıxarıb rəğbətləndirməkdən ibarət olub.

Müsabiqədə 5 komanda iştirak edib.

Ümumilikdə  təqdim edilmiş 40 sualı 10 saniyə ərzində cavablandıraraq ən yaxşı nəticə göstərən komanda  final turuna vəsiqə qazanıb. Yarışın yekun nəticələrinə əsasən, Çalxanqala kənd tam orta məktəbinin “NəqşiCahan” komandası 250 xal toplayaraq muxtar respublika mərhələsində iştirak etmək hüququ qazanıb.

Ülviyyə HACIYEVA

Naxçıvan Muxtar Respublikası Təhsil

Nazirliyinin mətbuat və ictimaiyyətlə

əlaqələr üzrə baş məsləhətçisi