Heydər Əliyev Uşaq-Gənclər Yaradıcılıq Mərkəzinin Milli dəyərlər, toxuculuq və dekorativ tətbiqi sənət şöbəsi “Dekorativ tətbiqi sənət” dərnəyi üzvlərinin “Naxçıvantəpə” yaşayış yerinə ekskursiyası təşkil edilib. Ekskursiya zamanı  AMEA-nın müxbir üzvü, tarix elmləri doktoru, professor Vəli Baxşəliyev iştirakçılara qədim yaşayış yeri və burada arxeoloji qazıntılar zamanı aşkarlanmış maddi mədəniyyət nümunələri barədə ətraflı məlumat verib. Bildirilib ki, Naxçıvançayın sağ sahilində, dəniz səviyyəsindən 853 metr yüksəklikdə yerləşən “Naxçıvantəpə” arxeoloji abidəsi Naxçıvanın qədim tarixini özündə əks etdirən yaşayış yerlərindən biridir. Burada 2017-ci ildən arxeoloji qazıntılar aparılıb, Neolit, Eneolit və digər dövrlərə aid keramika nümunələri, heyvan sümükləri aşkarlanıb. Bu nümunələr Cənubi Qafqazla  Yaxın Şərq mədəniyyətləri arasındakı əlaqələrin aşkarlanmasında və Naxçıvanın qədim dövr tarixinin öyrənilməsində böyük rola malikdir.

Dərnəyin istedadlı üzvləri burada mənzərə janrında maraqlı rəsmlər də çəkiblər.

Sonra AMEA Naxçıvan Bölməsinin Arxeologiya və Etnoqrafiya Muzeyində sərgilənən eksponatlara baxış olub. Burada iştirakçılara muxtar respublikası ərazisində arxeoloji qazıntılar zamanı aşkarlanmış  ən qədim dövrlərdən bugünədək olan  maddi mədəniyyət nümunələri barədə ətraflı məlumat verilib.