Məktəblilərdə təbiətə məhəbbət hissi aşılamaq və onların ekoloji biliklərini artırmaq məqsədilə iyunun 1-də Ümumdünya Ətraf Mühitin Mühafizəsi Günü ilə əlaqədar Naxçıvan şəhər 14 nömrəli tam orta məktəbdə Ekoloji Tərbiyə Mərkəzinin dərnək üzvləri arasında “Ətraf mühit və biz” mövzusunda bilik yarışması keçirilmişdir.

Bilik yarışmasının keçirilməsində əsas məqsəd şagirdlərin asudə vaxtlarının səmərəli təşkili, istedadlı uşaqların aşkar edilməsi, muxtar respublikanın zəngin təbiəti, fauna və florası, təbii sərvətləri haqqında dərnək üzvlərinə ətraflı məlumat verməkdən ibarət idi.

Bilik yarışmasında dərnək üzvlərinə muxtar respublikanın ekologiyasına həsr edilmiş 40 sual təqdim olunmuş və  hər sualın cavablandırılması üçün iştirakçılara 1 dəqiqə vaxt verilmişdir.

Münsiflər heyəti tərəfindən cavablar qiymətləndirilmiş və ən yüksək nəticə əldə edən qaliblər müəyyənləşdirilmişdir. Sonda I, II və III yerə layiq görülənlər təşkilatçılar tərəfindən diplomla mükafatlandırılmışdır.