Naxçıvan Muxtar Respublikası Şahmat Federasiyasının Kəngərli Rayon Bölməsinin, Kəngərli Rayon Təhsil Şöbəsinin və Uşaq-gənclər şahmat məktəbinin birgə təşkilatçılığı ilə Kəngərli və Şərur rayon şahmatçıları arasında “26-İyun Silahlı Qüvvələr Günü”nə həsr olunmuş tempo turniri keçirilib. Rayonun Uşaq-gənclər şahmat məktəbində keçirilən tempo turniri başlamazdan əvvəl Uşaq-gənclər şahmat məktəbinin direktoru Əli Hüseynzadə çıxış edərək yarış iştirakçılarını Silahlı Qüvvələr Günü münasibətilə təbrik edib və ulu öndər Heydər Əliyevin 1998-ci il mayın 22-də imzaladığı Fərmanla 26 iyun tarixinin Silahlı Qüvvələr Günü elan edildiyini vurğulayaraq Azərbaycanda güclü, qüdrətli və yüksək döyüş hazırlığına malik ordu yaradılmasının ümummilli liderin adı ilə bağlı olduğunu bildirib. O qeyd edib ki, Ali Baş Komandan İlham Əliyevin xüsusi diqqət və qayğısı sayəsində son illərdə ordunun döyüş qabiliyyəti daha da yüksəlib, maddi-texniki bazası möhkəmləndirilib, Azərbaycan Ordusu regionun ən qüdrətli ordusuna çevrilib və hər an düşmənə layiqli cavab vermək əzmindədir. Vurğulayıb ki, 2020-cı ilin sentyabrın 27-si başlayan II Qarabağ müharibəsində Azərbaycan Ordusunun rəşadət göstərərək düşməni məğlub etməsi və işğal altındakı Qarabağın azad olunması buna ən böyük nümunədir.
Daha sonra yarışa start verilib. Yarış Kəngərli və Şərur rayonlarından 43 şahmatçının iştirakı ilə keçirilib. İsveçrə sistemi ilə keçirilən yarış 7 turdan ibarət olub və oyunun sonuna qədər hər iştirakçıya 15 dəqiqə vaxt verilib.
Turnirin yekun nəticələrinə əsasən. ümumi yarışda Rzayev Pərviz I, Bayramov Ələddin II, Əliyev Ayxan isə III yerə layiq görülüb. 14 yaşadək oğlanlar arasında Allahverdiyev Zahid, 12 yaşadək oğlanlar arasında Cəfərov Səlvər, 10 yaşadək oğlanlar arasında Seyidli Miryusif I yerə layiq görülüb. 14 yaşadək qızlar arasında Rzayeva Sara, 12 yaşadək qızlar arasında Rzalı Məhcəbin, 10 yaşadək qızlar arasında isə Əhmədli İlkay I yerə layiq görülüb.
Tempo turnirinin qalibləri təşkilatçılar tərəfindən diplom və qiymətli hədiyyələrlə mükafatlandırılıblar.
