Naxçıvan Muxtar Respublikası Şahmat Federasiyasının Kəngərli rayon bölməsinin, Kəngərli Rayon Təhsil Şöbəsinin və Uşaq-gənclər şahmat məktəbinin birgə təşkilatçılığı ilə Uşaq-gənclər şahmat məktəbinin Yay Tədbirlər Planına uyğun olaraq ümumtəhsil məktəblərində təhsil alan şagirdlər arasında Tempo turniri keçirilib.

Yarışın keçirilməsində əsas məqsəd məktəblilər arasında intellektual idman növü olan şahmat oyununu təbliğ etmək, güclü şahmatçıları aşkara çıxarmaq, eyni zamanda şagirdlərin yay tətili dövründə asudə vaxtlarını mənalı və səmərəli təşkil etməkdən ibarət olub.

Tədbiri giriş nitqi ilə açan Uşaq-gənclər şahmat məktəbinin direktoru Əli Hüseynzadə bildirib ki, şahmat şagirdlərdə düşüncə tərzinin inkişafına, çevik qərar qəbuletmə, mürəkkəb şəraitlərdə taktika seçmək kimi vərdişlərin inkişafına təkan verir. Vurğulayıb ki, insanların şahmat kimi elmi bir idman növündən əldə etdiyi keyfiyyətlər digər karyeraların seçilməsində, düzgün qərarların qəbul edilməsində mühüm rol oynayır. O qeyd edib ki, Azərbaycanda şahmatın dövlət səviyyəsinə qaldırılması və ona qayğı göstərilməsi məhz ümummilli lider Heydər Əliyevin adı ilə bağlıdır.

Turnirin yekun nəticələrinə əsasən ümumi yarışda Şəhriyar Tarverdiyev I, Anar Cəfərli II, Səlvər Cəfərov III yerə layiq görülüb. 14 yaşadək oğlanlar arasında Şərif Hüseynli, 12 yaşadək oğlanlar arasında Uğur Vəliyev, 10 yaşadək oğlanlar arasında Mustafa Bəylərov I yerə layiq görülüb. 14 yaşadək qızlar arasında  Məhcəbin Rzalı, 12 yaşadək qızlar arasında Sara Rzayeva, 10 yaşadək qızlar arasında isə Mədinə Rzayeva I yerə layiq görülüb.

Tempo turnirinin qalibləri təşkilatçılar tərəfindən diplom və qiymətli hədiyyələrlə mükafatlandırılıblar.