01 sentyabr 2021-ci il tarixdən etibarən milli dəyərlərə və beynəlxalq standartlara əsaslanan “Təhsil Kursları”nın Kəngərli rayon filialı keyfiyyətini daha geniş auditoriyaya çatdırmaq üçün peşəkar və yüksək təcrübəyə malik müəllim komandası ilə abituriyent istiqaməti üzrə öz fəaliyyətinə başlayıb və hal-hazırda Qıvraq qəsəbə tam orta məktəbində xidmət göstərir.
Kursun təşkilində məqsəd Kəngərlidə təhsilin inkişafına yardım göstərmək, istedadlı gəncləri təhsil sistemində düzgün istiqamətləndirmək, ən qabaqcıl ali təhsil müəssisələrinə, orta ixtisas məktəblərinə və liseylərə qəbul olmaq istəyən şagirdlərə köməklik göstərməkdən ibarətdir.
Kurs təlim-tərbiyə prosesinin təşkilini, tədris materiallarının keyfiyyətlə mənimsənilməsini, şagirdlərin qabiliyyətlərinin inkişaf etdirilməsini əsas fəaliyyət istiqaməti kimi müəyyən edib.
“Təhsil Kursları”nın Kəngərli rayon filialı IX, X, XI sinif şagirdlərinin və məzunların buraxılış imtahanlarına və ali məktəblərə qəbul imtahanlarına hazırlığını, V-VIII sinif şagirdlərinin məktəbdən sonra fənlər üzrə hazırlığını və şagirdlərin bilik və bacarıqlarını ölçmək məqsədilə sınaq imtahanlarını həyata keçirəcəkdir.
Həmçinin kursda qrup şəklində ibtidai sinif hazırlığı, məktəbəqədər hazırlıq, ingilis və rus dilləri, mental aritmetika və kompüter kursları üzrə hazırlıq aparılacaqdır. Tədris prosesində yeni təhsil sənədləri (Kurikulum) əsasında hazırlanmış Dövlət İmtahan Mərkəzinin proqramlarına uyğun dərs vəsaitləri və testlərdən istifadə ediləcəkdir.
Dərslər müasir tələblərə uyğun metodlarla təcrübəli, yüksək peşəkarlıq qabiliyyətinə malik, obyektivliyi və qərəzsizliyi ilə seçilən nüfuzlu müəllimlər tərəfindən keçiriləcəkdir.
Artıq filialda dərs cədvəllərinin tərtib edilməsi, müəllimlərin fənlər üzrə dərs vəsaitləri və proqramlarla təmin edilməsi və digər maddi və texniki şəraitin qaydaya salınması işləri də uğurla həyata keçirilir.
Qeyd edək ki, “Təhsil Kursları”nın Kəngərli rayon filialı hər il təhsillə bağlı müxtəlif imtahanlara hazırlaşanları qəbul edəcək və burada tədris olunan dərslər həftəlik Dərsi Qiymətləndirmə Testləri (DQT), aylıq Mövzu Qiymətləndirmə Testləri (MQT) və Ümumi Qiymətləndirmə Testləri (ÜQT) ilə yoxlanılacaq.
