Naxçıvan Qarnizonu tam orta məktəbin XI sinif məzunu Həsənova Nərmin Mikayıl qızı Dövlət İmtahan Mərkəzi tərəfindən 10 iyun 2018-ci il tarixində keçirilən  sonuncu sınaq imtahanında IV ixtisas qrupu üzrə 700 bal toplayaraq maksimum nəticə əldə etmişdir.

Qeyd edək ki, Nərmin ən böyük uğurlarını 2017-2018-ci dərs ilində - XI sinifdə qazanıb. Bu il ərzində Naxçıvan Muxtar Respublikası Təhsil Nazirliyinin təşəbbüsü ilə keçirilən bütün sınaq imtahanlarında 500-700 bal intervalında yüksək nəticələr əldə edib. Bu nailiyyətlərinə görə Naxçıvan Muxtar Respublikası Təhsil Nazirliyinin və Naxçıvan Qarnizon tam orta məktəbinin fəxri fərmanlarına layiq görülüb. Nərminin uğurları bununla kifayətlənməyib, eyni zamanda, O, 2017-2018-ci dərs ilində keçirilən məktəblilərin fənn olimpiadalarının Azərbaycan Respublikası turunda Kimya fənnindən III yerə layiq görülüb. Cari ilin may ayında keçirilən ali təhsil müəssisələrinə qəbul imtahanlarının birinci mərhələsində 638 bal toplamışdır.

Nərminin qəbul və sınaq imtahanları haqqındakı təəssüratları:

İlk olaraq qeyd edim ki, mənim nailiyyətlərimdə təhsil aldığım Naxçıvan Qarnizonu tam orta məktəbində tədrisin yüksək səviyyədə təşkil olunması, təbiət təmayüllü sinifdə oxumağım, məktəb daxilində tez-tez ixtisas qrupum üzrə daxili sınaqlarda iştirak edərək proqram materiallarını tam mənimsəməyim uğurlu nəticələr göstərməyimə əsas səbəbdir. Mən həm özümə, həm də yaxınlarıma tövsiyyə edirəm ki, daha çox çalışaraq uğurlu nəticələr əldə etsinlər.