Bu gün Naxçıvan Muxtar Respublikası Şahmat Federasiyasının Kəngərli rayon bölməsinin, Kəngərli Rayon Təhsil Şöbəsinin və Uşaq-gənclər şahmat məktəbinin birgə təşkilatçılığı ilə Yeni Azərbaycan Partiyasının yaradılmasının 29-cu ildönümü münasibətilə ümumtəhsil məktəblərində təhsil alan şagirdlər arasında “Yeni Azərbaycan Partiyası – 29 illik zəfər simvolu” devizi altında tempo turniri keçirilib.
Təhsil Şöbəsinin müdiri Emin Məmmədxanlı tədbiri giriş nitqi ilə açaraq Yeni Azərbaycan Partiyasının yaradılmasının 29-cu ildönümü və Vətən müharibəsində qazanılan tarixi zəfərin birinci ildönümü münasibətilə yarış iştirakçılarını təbrik edib. O çıxışında 44 günlük müharibədən, Ali Baş Komandan İlham Əliyevin rəhbərliyi ilə Azərbaycan Ordusunun göstərdiyi şücaətdən və 29 illik tarixi yolda Ulu öndər Heydər Əliyevin yaradıcısı olduğu Yeni Azərbaycan Partiyasının ölkəmizin ictimai-siyasi həyatında əhəmiyyətli rolundan danışıb. Bildirib ki, bu gün Yeni Azərbaycan Partiyasının yaradılmasının 29-cu ildönümünü qalib xalq kimi zəfər qazanmış dövlətimizdə qeyd edirik.
Daha sonra Kəngərli Rayon İcra Hakimiyyətinin əməkdaşı Ramil Tahirov çıxış edərək bildirib ki, Ulu Öndərimizin “Dünənin, bu günün, gələcəyin partiyası” deyə qiymətləndirdiyi Yeni Azərbaycan Partiyasının xalq, dövlət qarşısındakı böyük xidmətləri bu nəhəng təşkilatın cəmiyyətdəki mövqelərini get-gedə daha da möhkəmləndirir, insanların bu partiyanın ideoloji-siyasi xəttinə dəstəyini gücləndirir. Vurğulayıb ki, Yeni Azərbaycan Partiyası əbədi liderimiz Heydər Əliyevin xilaskarlıq missiyasına siyasi-mənəvi dayaq olan, onun adı ilə simvollaşan, məsuliyyət sükanını böyük məharətlə əlində saxlayan Prezidentimiz və Partiyamızın Sədri cənab İlham Əliyevin xalqın mütləq əksəriyyətinin dəstəyi ilə həyata keçirdiyi müstəqil, qətiyyətli və milli maraqlara əsaslanan siyasəti nəticəsində dinamik inkişaf edən ölkəmizin daha da qüdrətlənməsi, möhkəmlənməsi naminə öz prinsip və amallarına daim sadiq olan möhtəşəm partiyadır.
Uşaq-gənclər şahmat məktəbinin direktoru Əli Hüseynzadə yarışın keçirilmə qaydaları haqqında iştirakçılara məlumat verdikdən sonra yarışa start verilib.
Yarış 7 turdan ibarət olmaqla İsveçrə sistemi ilə keçirilib.
Yarışda 35 şagird iştirak edib.
Turnirin yekun nəticələrinə əsasən, ümumi yarışda Zahid Allahverdiyev I, Məhcəbin Rzalı II, Anar Cəfərli isə III yerə layiq görülüb. 10 yaşadək oğlanlar arasında Mustafa Bəylərov, 12 yaşadək oğlanlar arasında Şəhriyar Tarverdiyev, 14 yaşadək oğlanlar arasında Əbdüləzim Abdullayev I yerə layiq görülüb, 10 yaşadək qızlar arasında Mədinə Rzayeva, 12 yaşadək qızlar arasında Sara Rzayeva, 14 yaşadək qızlar arasında isə Özləm Musayeva I yerə layiq görülüb.
Qaliblər təşkilatçılar tərəfindən diplom, hədiyyə və pul mükafatı ilə mükafatlandırılıblar.
