25 noyabr 2021-ci il tarixdə Naxçıvan şəhər 1 nömrəli tam orta məktəbdə Naxçıvan Şəhər Təhsil Şöbəsinin, Naxçıvan Şəhər İdman İdarəsinin və Naxçıvan Gənc Müəllimlər Assosiasiyası İctimai Birliyinin birgə təşkilatçılığı ilə Naxçıvan şəhər ümumtəhsil məktəblərində fəaliyyət göstərən Gənc müəllimlər arasında “Stolüstü tennis” birinciliyi keçirilmişdir.

Tədbiri giriş sözü ilə açan Naxçıvan Gənc Müəllimlər Assosiasiyası İctimai Birliyinin sədri Gülxanım Orucova birinciliyin keçirilmə məqsədi haqqında danışmış və müəllimlərə uğurlar arzulamışdır.

Daha sonra Naxçıvan Şəhər Gənclər və İdman İdarəsinin baş məsləhətçisi Elşən Rəfiyev və Təhsil Şöbəsinin əməkdaşı Şahmar Hüseynov çıxış edərək birinciliyin qaydaları haqqında məlumat vermişlər. Yarışda ümumilikdə 20 müəllim iştirak etmişdir. Olimpiya sistemi üzrə (uduzan çıxır) stolüstü tennisin mövcud qaydalarına əsasən keçirilən yarışın yekununa gəlincə, qadınlar arasında 14 nömrəli tam orta məktəbin müəllimi Xurşud Mahmudova I yerə, 1 nömrəli tam orta məktəbin müəllimi Surə Qasımova II yerə, 14 nömrəli tam orta məktəbin müəllimi Türkan Zülfüqarova III yerə, Naxçıvan şəhər 3 nömrəli tam orta məktəbin müəllimi Sadiqova Xədicə həvəsləndirici yerə, kişilər arasında isə 8 nömrəli tam orta məktəbin müəllimi Ramid Yaqubov I yerə, 16 nömrəli tam orta məktəbin müəllimi Zeynalabdin Əhmədli II yerə, 4 nömrəli tam orta məktəbin müəllimi Ruslan Zeynalov III yerə, Naxçıvan şəhər 7 nömrəli tam orta məktəbin müəllimi Əliyev Mehrac həvəsləndirici yerə layiq görülmüşdür.

Sonda yer tutan müəllimlər təşkilatçıların diplomları ilə mükafatlandırılmışlar.