24 noyabr 2021-ci il tarixdən etibarən Kəngərli Rayon Təhsil Şöbəsinin təşkilatçılığı ilə ümumtəhsil məktəblərinin II-IV və V-VIII sinif şagirdləri arasında “Bizim sinif: Bizim məktəb” adlı bilik yarışının məktəb mərhələsinə start verilib.
Bilik yarışının keçirilməsində məqsəd şagirdlərə müstəqil düşünmək, sərbəst fikir söyləmək, öz təcrübə və biliyini təhlil etmək, özünüqiymətləndirmə, əməkdaşlıq etmək bacarıqlarını aşılamaq, onlarda kreativ təfəkkürü inkişaf etdirmək, intellektual fəaliyyətə cəlb etmək, fənlərə dair məktəblilərin məlumatlılıq səviyyəsini yüksəltmək, şagirdlər arasında sağlam rəqabət mühitini formalaşdırmaq, mövcud intellektual bazalarını genişləndirmək, onların şəxsiyyətinin və həyat boyu öyrənmək, cəmiyyət üçün məhsuldar üzv olması üçün vacib olan metakoqnitiv qabiliyyətlərinin inkişafına və yaradıcı qabiliyyətlərinin reallaşdırılması üçün əlverişli şərait yaratmaq, eləcə də asudə vaxtlarının səmərəli təşkili istiqamətində yeni üsullar tətbiq etməkdən ibarətdir.
Bilik yarışı siniflərə uyğun Azərbaycan dili, Riyaziyyat, Həyat bilgisi, Biologiya, Coğrafiya, Fizika və Kimya fənləri üzrə keçirilir. Bilik yarışında fənlər üzrə ümumilikdə 50 sual səsləndirilir və komandalar bilik yarışının mərhələlərinə uyğun müvafiq ballarla qiymətləndirilirlər.
Bilik yarışının məktəbdaxili mərhələsində 12 ümumtəhsil müəssisəsindən 600-dən çox məktəbli iştirak edir.
Bilik yarışının məktəb mərhələsi 30 noyabr 2021-ci il tarixdə yekunlaşacaq.
Yekun nəticələrə görə, hər sinif üzrə birinci yeri tutan məktəb komandası rayon mərhələsinə vəsiqə qazanacaq.
Rayon üzrə bilik yarışının yekunu isə dekabr ayına təsadüf edəcək.
Ümumilikdə, bütün qaliblər diplomlarla təltif olunacaq və Təhsil Şöbəsinin xüsusi hədiyyələrinə layiq görüləcəklər.
Qeyd edək ki, müxtəlif siniflər üzrə keçirilən bilik yarışı rayondaxili xarakter daşıyır.
Bilik yarışının keçirilməsi ümumtəhsil məktəbləri arasında sağlam rəqabət mühiti formalaşdıracaq, təhsilin keyfiyyətinin yüksəldilməsinə, məktəblilərin potensial intellektinin qiymətləndirilməsinə və dəyərləndirilməsinə imkan verəcək.
