15 dekabr 2021-ci il tarixdə Naxçıvan Şəhər Təhsil Şöbəsinin, Gənclər və İdman İdarəsinin, Naxçıvan Gənc Müəllimlər Assosiasiyasının birgə təşkilatçılığı ilə Naxçıvan şəhər ümumtəhsil məktəblərində fəaliyyət göstərən gənc müəllimlər arasında İntellektual oyun keçirilmişdir.

Tədbirdə iştirak edən Naxçıvan Gənclər və İdman İdarəsinin rəisi Xəyal Qurbanov və Naxçıvan Gənc Müəllimlər Assosiasiyasının sədri Gülxanım Orucova bildirmişlər ki, gənc müəllimlərin intellektual səviyyəsini, dünyagörüşünü, zehni inkişafını stimullaşdırmaq və asudə vaxtalrının səmərəli keçirilməsi məqsədi ilə bir sıra tədbirlər həyata keçirilir. Bu gün təşkil olunan “Nə, Harda, Nə zaman” intellektual oyunu da bu baxımdan çox böyük əhəmiyyətə malikdir.

Tədbirdə çıxış edən Naxçıvan Şəhər Təhsil Şöbəsinin əməkdaşı Şahmar Hüseynov oyunun keçirilməsi qaydaları ilə komandaları tanış etmişdir. Bildirmişdir ki, İntellektual oyuna10 komanda cəlb olunub və hər komanda da 4 müəllim olmaqla ümumilikdə 40 müəllim iştirak edir. İntellektual oyun 2 turdan ibarət olacaq və hər turda 12 sual olmaqla ümumilikdə 24 sual səsləndiriləcəkdir. Hər düzgün cavaba görə komandaya 1 xal veriləcək, daha çox xal qazanan komanda qalib olacaqdır.

Sonda Naxçıvan şəhər 5 nömrəli  tam orta məktəbin “Dəmir yumruq” komandası I yerə,  Naxçıvan şəhər 1 nömrəli tam orta məktəbin “Zəfər” komandası II yerə,  Naxçıvan şəhər 13 nömrəli  tam orta məktəbin “Zümrüd” komandası III yerə layiq görülmüşdür.

İntellektual oyunda I, II, III yerləri tutan  komandalara və onların üzvlərinə təşkilatçıların diplomları təqdim olunmuşdur.