Naxçıvan Muxtar Respublikası Təhsil Nazirliyi, Naxçıvan şəhər Məhkəməsi və Naxçıvan Muxtar  Respublikası  Daxili İşlər  Nazirliyinin Dövlət Yol Polisi idarəsi ilə birgə 31 Dekabr Dünya Azərbaycanlılarının Həmrəylik Günü münasibətilə “N” saylı hərbi hissənin şəxsi heyətinə bayram sovqatı təqdim olunub.Tədbirdə çıxış edən Təhsil naziri Rəhman Məmmədov  hərbi hissənin şəxsi heyətini Dünya Azərbaycanlılarının Həmrəylik günü və Yeni il münasibətilə təbrik edərək belə görüşlərin keçirilməsinin xalq və ordu həmrəyliyinin ən yaxşı göstəricilərindən biri olduğunu bildirib.

Vurğulanıb ki, Ali Baş Komandanın rəhbərliyi ilə rəşadətli Azərbaycan Ordusu tariximizə Böyük Qələbə Zəfərini yazdı. Bu gün xalqla arasında möhkəm sarsılmaz birliyin mövcud olması ordumuzun gücünü daha da artırır. Vətən müharibəsində tarixi qələbənin əldə olunmasında naxçıvanlı əsgər və zabitlər böyük şücaət və fədakarlıq nümunəsi göstəriblər.  Təhsil naziri qeyd edib ki 2021-2022- ci  tədris ilindən etibarən ümtəhsil müəssisələrinin IX siniflərində təhsil alan şagirdlərə “Zəfər Tarixi” dərsi tədris edilir. “Zəfər Tarixi” dərsliyində I Qarabağ müharibəsi və vətən müharibəsi barəsində şagirdlərə geniş məlumat verilir. Dərslikdə Ümumqoşun Ordunun uğurlu Günnüt əməliyyatı barədə də məlumat verildiyini bildirən Təhsil Naziri qeyd etmişdir ki, 2018-ci ildə həyata keçirilən uğurlu Günnüt əməliyyatı hərbiçilərimizin qarşıya qoyulan istənlən tapşırığı yerinə yetirmək əzmidə olduqlarını sübut etdi. “N” saylı hərbi hissənin şəxsi heyəti adından çıxış edən Hərbi Hissə komandirinin müavini mayor Sərxan İmanov ordu quruculuğu sahəsində görülən işlərdən danışıb, onların hər zaman diqqət və qayğı ilə əhatə olunduğunu, heç bir bayramda unudulmadıqlarını qeyd edərək minnətdarlığını bildirib.