Naxçıvan Muxtar Respublikası Təhsil Nazirliyi tərəfindən Kenquru Beynəlxalq Riyaziyyat Müsabiqəsininqaliblərinin mükafatlandırılması ilə bağlı tədbir keçirilib.
Tədbirdə Naxçıvan Muxtar Respublikasının təhsil naziri Rəhman Məmmədov çıxış edərək bildirib ki, dövlətimizin hərtərəfli diqqət və qayğısı ilə təhsil müəssisələrinin maddi-tədris bazası daha da möhkəmləndirilib, tədris prosesi günün tələbləri səviyyəsində qurulub. Fənn kabinələri, fizika, kimya, biologiya laboratoriyaları zəruri avadanlıqlarla təmin olunub. Bütün bunlar isə təhsilin səviyyəsinin yüksəldilməsinə geniş imkanlar açıb.
Təhsil naziri bildirib ki, istedadı və yaradıcı təfəkkürü ilə seçilən şagirdləri aşkar etmək istiqamətində də müxtəlif tədbirlər həyata keçirilir. Muxtar respublika məktəblilərinin olimpiada hərəkatında daha fəal iştirak etmələri məqsədilə cari tədris ilində muxtar respublika və respublika olimpiadaları ilə yanaşı beynəlxalq olimpiada və müsabiqələr də keçirilib.
Cari tədris ilində IX-XI sinif şagirdləri üçün “Məktəblilərin muxtar respublika fənn olimpiadaları”, “Respublika fənn olimpiadaları”nın rayon (şəhər) və yarımfinal mərhələləri, II-X sinif şagirdləri üçün “Kenquru Beynəlxalq Riyaziyyat Müsabiqəsi”, VII-IX sinif şagirdləri üçün “Amerikan Riyaziyyat Müsabqəsi” keçirilmişdir. Növbəti aylarda isə “Respublika fənn olimpiadaları”nın final mərhələsi, V siniflər üçün “Lütfi Zadə adına Məktəblilərarası Məntiq Olimpiadası”, VI-VII siniflər üçün “Respublika fənn müsabiqəsi”, I-XI sinif şagirdləri üçün isə “SASMO” Beynəlxalq riyaziyyat olimpiadasının keçirilməsi nəzərdə tutulur.
Diqqətə çatdırılıb ki, müsabiqə və olimpiadaların keçirilməsində məqsəd xüsusi istedadlı uşaqların üzə çıxarılması, şagirdlərdə fənlərə olan marağın artırılması, onların sağlam rəqabət mühitində öz bilik və bacarıqlarını nümayiş etdirmələrinə və peşə seçiminə hazırlanmasına zəmin yaradılmasından ibarətdir.
Təhsil naziri Kenquru Beynəlxalq Riyaziyyat Müsabiqəsinin əhəmiyyətindən də danışaraq bildirib ki, müsabiqə hər il mərkəzi Fransa olmaqla dünyanın 80-dən çox ölkəsində təşkil olunur.
Qeyd olunub ki, Naxçıvan Muxtar Respublikası Təhsil Nazirliyinin təşkilatçılığı ilə 14 noyabr 2021-ci il tarixdə muxtar respublikada da ilk dəfə olaraq Kenquru Beynəlxalq Riyaziyyat Müsabiqəsi keçirilmişdir.. Müsabiqədə təhsil müəssisələrinin II-X siniflərində təhsil alan 2302 şagird riyaziyyat fənni üzrə öz biliklərini yoxlayıblar .
İştirakçıların diqqətinə çatdırılıb ki, Təşkilat Komitəsi tərəfindən müsabiqənin nəticələri qiymətləndirilmiş, muxtar respublika şagirdlərindən 43 nəfəri qaliblər sırasına daxil edilmişdir. Bunlardan 10-u I, 14-ü II, 19-u isə III yerin qalibləridir.
Rəhman Məmmədov qalibləri təbrik edib, onlara təhsildə uğurlar arzulayıb.
Tədbirdə Naxçıvan Muxtar Respublikası Təhsil Nazirliyi Aparatının şöbə müdiri Abdulla Əsgərov müsabiqənin əhəmiyətindən danışıb.
Heydər Əliyev adına tam orta məktəbin 10-cu sinif şagirdi, 1-ci yerin qalibi Əyyub Rzayev, Naxçıvan şəhər 5 nömrəli məktəbin 8-ci sinif şagirdi, 2-ci yerin qalibi Nuray Cəfərli muxtar respublikada onlar üçün yaradılan müasir tədris şəraitinə görə dövlətimizə minnətdarlıq ediblər.
Sonda müsabiqə qaliblərinə diplom və medallar təqdim olunub.
