Xalqımızın qədim tarixini əks etdirən, milli adət və ənənələrimizi özündə birləşdirən Novruz bayramı münasibətilə təşkil olunmuş müsabiqə martın 16-da Naxçıvan şəhər 4 nömrəli tam orta məktəbdə keçirilib. İnşa yazı müsabiqəsində muxtar respublika ümumtəhsil məktəblərinin IX-XI siniflərində təhsil alan 34 şagird iştirak edib. Naxçıvan Muxtar Respublikası Təhsil Nazirliyi Aparatının aparıcı məsləhətçisi Elxan Babayev çıxış edərək şagirdlərin tariximiz və adət-ənənələrimiz ilə bağlı məlumatlandırılmasının, milli adət-ənənələrin gələcək nəsillərə ötürülməsinin və milli-mənəvi dəyərlərimizin qorunub saxlanılmasının vacibliyini vurğulayıb.
Şagirdlər 2 saat ərzində Novruz bayramı ilə bağlı inşa yazıblar.
Müsabiqə iştirakçılarının yazı işləri münsiflər heyəti tərəfindən yoxlanılaraq qiymətləndirilib.
Nəticələrə uyğun olaraq inşa yazı müsabiqəsində Naxçıvan Qızlar Liseyinin XI sinif şagirdi Abdullayeva Nigar Samir qızı I yerə, Naxçıvan şəhər 8 nömrəli tam orta məktəbinin X sinif şagirdi Kəngərli Aydan Azər qızı, Kəngərli rayon Yurdçu kənd tam orta məktəbinin X sinif şagirdi Abbasova Günay Faiq qızı II yerə, Babək rayon Şıxmahmud kənd tam orta məktəbinin XI sinif şagirdi Şahverdiyeva Səma Mirzə qızı, Kəngərli rayon Yurdçu kənd tam orta məktəbinin X sinif şagirdi Abdullayeva Aysu Xəyal qızı və Şahbuz rayon Badamlı kənd tam orta məktəbinin şagirdi Əliyeva Tərlan Asəf qızı III yerə layiq görülüblər.
