Ekskursiyada Naxçıvan Muxtar Respublikası Təhsil Nazirliyi Aparatının sektor müdiri Rasim Rüstəmov bildirib ki, Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər haqqında” 2021-ci il 25 iyun tarixli Sərəncamı ilə pedaqoji profilli ixtisaslar Naxçıvan Muxtar Respublikası Təhsil Nazirliyinə hamiliyə verilib. Sərəncama uyğun olaraq müəllim kadrların hazırlanması üçün ali təhsil müəssisələri ilə Naxçıvan Muxtar Respublikası Təhsil Nazirliyi arasında sıx əlaqələr yaradılıb.
Qeyd olunub ki, bu günkü ekskursiyada da məqsəd innovativ dərnəklər haqqında gələcəyin müəllimlərinə ətraflı məlumat vermək, onların bu sahə üzrə bilik və bacarıqlarını inkişaf etdirməkdir.
Rasim Rüstəmov təcrübəçi tələbələrə mərkəzdə yeni yaradılan innovativ dərnəklər haqqında ətraflı məlumat verib. Bildirilib ki, 2019-cu ildə “İnnovativ dərnəklər” layihəsi əsasında mərkəzdə 14 adda yeni innovativ dərnəklər yaradılıb. Uşaq və gənclərin asudə vaxtlarının səmərəli təşkili, onların yaradıcılıq qabiliyyətlərinin və istedadlarının üzə çıxarılması üçün dərnəklər lazımi avadanlıqlarla təmin edilib və nümunəvi tədris şəraiti yaradılıb.
Tələbələr mərkəzdə yaradılan Robotexnika, Memarlıq-dizayn, Mental aritmetik, Xalçaçılıq, Metal üzərində bədii döymə, Ağac üzərində oyma, Ebru sənəti, Qum sənəti, Dulusçuluq, Dram, Gimnastika və Sürətli oxu innovativ dərnəkləri ilə yaxından tanış olublar.
Qeyd edək ki, martın 30-dək davam edəcək ekuskursiyada Naxçıvan Dövlət Univeristeti, “Naxçıvan” Univeristeti və Naxçıvan Müəllimlər İnstitunun təcrübəçi tələbələri iştirak edəcək.
