Naxçıvan Gənc Müəllimlər Assosiasiyasının sədri Gülxanım Orucova iştirakçıların diqqətinə çatdırıb ki, Naxçıvan Muxtar Respublikası ümumtəhsil məktəblərində fəaliyyət göstərən gənc müəllimlər arasında yanvar-mart aylarında “Nə? Harada? Nə zaman?” intellektual oyunun rayon mərhələsi keçirilmişdir. Rayonlar üzrə qalib olan komandalar final mərhələsində iştirak etmək hüququ qazanmışlar. Bu gün isə “Nə? Harada? Nə zaman?” intellektual oyunun muxtar respublika mərhələsi keçirilir.
İntellektual oyunun qaydaları ilə gənc müəllimləri tanış edən Gülxanım Orucova bildirmişdir ki, final mərhələsində şəhər və rayon Təhsil Şöbələrinin tabeliyində olan ümumtəhsil məktəblərindən 1 komanda, Naxçıvan Muxtar Respublikası Təhsil Nazirliyinə birbaşa tabe məktəblərdən 1 komanda olmaqla ümumilikdə 9 komanda iştirak edir. İntellektual oyun 3 turdan ibarət olacaq və hər turda 12 sual olmaqla ümumilikdə 36 sual səsləndiriləcəkdir. Hər düzgün cavaba görə komandaya 1 xal veriləcək, daha çox xal qazanan komanda qalib olacaqdır. İntelektual oyunda Şahbuz rayonun “Batabat” komandası I yerə, Naxçıvan şəhər 5 nömrəli tam orta məktəbin “Zəfər” komandası II yerə, Ordubad rayonun “Qeysəriyyə” komandası III yerə layiq görülüb. I, II və III yerləri tutan komandalara diplomlar təqdim olunub.
