Naxçıvan Muxtar Respublikası Təhsil Nazirliyinin nəzdində gözdən əlil uşaqlar üçün Xüsusi İbtidai Məktəbdə keçirilən tədbirdə təhsil nazirinin müavini Heyran Əhmədova bildirmişdi ki, bu gün muxtar respublikada dövlətimiz tərəfindən digər uşaqlar kimi fiziki imkanı məhdud uşaqların da təhsili diqqət mərkəzində saxlanılır. Bu məqsədlə muxtar respublikada Gözdən Əlillər üçün Xüsusi İbtidai Məktəb, Distant Tədris Mərkəzi, əmək terapiyası, audio və elektron kitabxana xidmətləri yaradılmış, nitq problemləri olan uşaqlar üçün defektoloji bölmə fəaliyyətə başlamış, təhsilin təşkili ilə əlaqədar görmə qabiliyyəti məhdud uşaqlar üçün brayl kurslar təşkil edilmişdir.
Qeyd olunub ki, yaradılan şəraitin nəticəsidir ki, fiziki, psixi, intellektual və digər xüsusiyyətlərindən asılı olmayaraq həmin kateqoriyadan olan uşaqların öz həm yaşıdları ilə bərabər təhsilə cəlbinin davamlılığı təmin edilmişdir. Heyran Əhmədova “1 iyun-Uşaqların Beynəlxalq Müdafiəsi Günü” ilə bağlı şagirdləri təbrik edib, onlara hədiyyələr təqdim olunub. “1 iyun-Uşaqların Beynəlxalq Müdafiəsi Günü” ilə bağlı Ordubad şəhər tam orta internat məktəbində keçirilən tədbirdə Ordubad Rayon Təhsil Şöbəsinin müdiri Samir Zeynalov və Naxçıvan Muxtar Respublikası Təhsil Nazirliyi Aparatının baş məsləhətçisi Sahil Əlizadə uşaqları təbrik edib, onlara göstərilən dövlət qayğısında danışıblar. Qeyd edilib ki, muxtar respublikamızda bütün qəbildən olan uşaqlar hər cür dövlət qayğısı ilə əhatə olunur, onların sağlam böyümələri, biliklərə yiyələnmələri, intellektual inkişafı, milli-mənəvi dəyərlərə sadiq, vətənpərvər gənc kimi formalaşması istiqamətində ardıcıl tədbirlər həyata keçirilir. Diqqətə çatdırılıb ki, asudə vaxtlarının səmərəli keçirilməsi məqsədilə uşaqlar dərnəklərə, idman klublarına cəlb olunur, tarix-memarlıq abidələrinə, muzeylərə, istirahət guşələrinə ekskursiyaları təşkil olunur. Tədbirdə uşaqlara hədiyyələr təqdim olunub.
