STEAM tədris edən müəllimlərin XXI əsr bacarıqlarının inkişaf etdirilməsi, müxtəlif proqramlaşdırma dillərini tətbiq etməklə innovativ texnologiyalardan istifadə qabiliyyətinin yüksəldilməsi üçün Naxçıvan Muxtar Respublikası Təhsil Nazirliyi tərəfindən təlimlər təşkil olunur. Heydər Əliyev adına tam orta məktəbdə yaradılan STEAM Tədris Mərkəzinin imkanlarından yararlanaraq bu günədək 400-ə yaxın müəllim bu sahə üzrə təlimlərə cəlb olunub. Təlimlər çərçivəsində müəllimlərə layihə əsaslı öyrənmə, innovativ təlim metodikaları və digər bu kimi istiqamətlərdə praktik biliklər verilir. Bu tədbirlərin davamı olaraq “STEAM Azərbaycan” layihəsinin beynəlxalq təcrübəli təlimçiləri tərəfindən muxtar respublikanın ümumtəhsil məktəblərində STEAM dərslərini tədris edən müəllimlər üçün rayonlarda təlim təşkil olunub.
Təlim müddətində müəllimlərə STEAM təhsilinin mahiyyəti və sadə modellərin hazırlanması, mikro:bit mövzusuna giriş, micro:bit modulu və kodlaşdırma, micro:bit vasitəsilə müxtəlif layihələrin hazılanması, arduino texnologiyası, arduino vasitəsilə müxtəlif layihələrin hazırlanması, “Sistem nəzəriyyələri” öyrədilir.Təlimlər “STEAM Azərbaycan” layihəsinin əməkdaşları Təranə İbrahimli, Abduləziz İbrahim, Ülkər Mirzalıyeva, Elməddin Musayev tərəfindən keçirilir.
Naxçıvan şəhərində və muxtar respublikanın rayonlarında təşkil olunan təlimlərə ümumtəhsil məktəblərindən STEAM dərslərini tədris edən 150-ə yaxın müəllim cəlb olunub.
