Artıq neçə illərdir ki, muxtar respublikamızda da təhsil məkanında islahatlar ardıcıl və sistemli şəkildə təhsilin müxtəlif pillə və səviyyələri nəzərə alınmaqla həyata keçirilir. Həyata keçirilən təhsil siyasətinə uyğun olaraq onun dünya təhsil sisteminə inteqrasiya olunması zəruri şərt kimi diqqət mərkəzində saxlanılır.  Elə bu məqsədlə də 2008-2009-cu tədris ilindən etibarən ümumi təhsil məktəblərində yeni kurikulumların tətbiqinə başlanmışdır.

Naxçıvan Dövlət Texniki Kollecinə ümumi orta təhsil bazasından qəbul olunan tələbələr də fənn kurikulumları ilə tədris aparılmış siniflərin məzunlarıdır. Bu mənada Kollecdə fənn kurikulumlarının tətbiqi mühüm əhəmiyyət daşıyır. Kollecin müəllimlərinin fənn kurikulumları ilə yaxından tanış olmaları və bu sahədə təcrübə mübadiləsinin həyata keçirilməsi məqsədilə 08 oktyabr 2018-ci il tarixdən 02 noyabr 2018-ci il tarixədək Naxçıvan Dövlət Texniki Kollecində kurikulum seminarları keçirilməyə başlanıb.

Ana-dili və Ədəbiyyat, İngilis dili, Riyaziyyat, İnformatika, Tarix, Coğrafiya, Fizika, Kimya və Biologiya müəllimlərinin iştirak edəcəyi seminarların keçirilməsində məqsəd fənlər üzrə təlim prosesinin qurulması üçün zəruri hesab edilən didaktik və metodik prinsiplərin, təlimin təşkili formaları və üsulları, planlaşdırmaya  aid bilik və bacarıqların öyrənilməsi  və təlim prosesində yaradıcı şəkildə tətbiq edilməsinə dair məsələlərdə müəyyən təcrübələrə yiyələnməkdir.

Seminarlarda Naxçıvan şəhər ümumtəhsil məktəbləri və Naxçıvan Dövlət Texniki Kollecin 300-ə yaxın müəllimi iştirak edəcəkdir.